काठमाडौं– नेपाली कांग्रेसका नेता डा. शेखर कोइरालाले ‘सुरक्षा परिषदको सिफारिसविना प्रधानमन्त्रीले सीधै सेना परिचालन गर्न सक्ने’ गरी ल्याउन लागेको विधेयक नेपाली कांग्रेसले कुनै पनि हालतमा नस्विकार्ने बताएका छन् । चितवनको टॉडीमा आयोजित नेपाली कांग्रेसको प्रशिक्षण कार्यक्रममा बोल्दै कोइरालाले प्रधानमन्त्री केपी ओली शक्तिको भोको भएकाले राज्यका महत्वपूर्ण सबै निकाय आफूमातहत राखेको आरोप लगाए ।
सो विधेयकले नेपाली सेनाको मनोबल घटाउने उल्लेख गर्दै डा. कोइरालाले प्रधानमन्त्रीले सीधै सेना परिचालन गर्ने विधेयक पास भएमा त्यही दिनदेखि लोकतन्त्र समाप्तिको बाटोतर्फ लाग्ने बताए । लोकतन्त्रविरोधी र निरंकुशताको पक्षपोषण गर्ने यो विधेयक कदापि स्विकार्न नसकिने उनको भनाइ थियो ।
गिरिजाप्रसाद कोइराला नेतृत्वको आन्दोलनले संसद् पुनस्थापना नगरेको भए धेरै नेता अहिलेसम्म पनि जेलमै हुने भन्दै डा. कोइरालाले संसद् पुनस्थापनाकै जगमा मुलुकले अहिलेको उपलब्धि प्राप्त गरेको बताए । तर, अहिले सो मुद्दालाई पार्टीभित्रैबाट छायामा पार्ने प्रयास भएको भन्दै दूरदराजका कर्मठ र इमानदार कार्यकर्तालार्ई पार्टीले न्याय दिन नसकेको बताए ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
