काठमाडौंमा जारी दोस्रो संस्करणको नेपाल सुपर लिग (एनएसएल) मा चितवन एफसीले पहिलो जित दर्ता गरेको छ । उसले शुक्रबार आफ्नो तेस्रो खेलमा वीरगञ्जलाई २–१ ले हराउँदै चितवनले पहिलो जित दर्ता गरेको हो । 

चितवनले पहिलो संस्करणमा कुनै पनि खेलमा स्पष्ट तीन अंक जोडेको थिएन । त्रिपुरेश्वस्थित दशरथ रंगशालामा भएको खेलमा चितवनका लागि आइकोनिक खेलाडी फरवार्ड विमल घर्ती मगर र मिडफिल्डर टोरिक जेब्रीनले गोल गरे । वीरगञ्जका लागि ऐकिन्स बाफोरले एक गोल फर्काए ।  

खेलको २८ औं मिनेटमा विमलले वान भर्सेस वानमा वीरगञ्जका गोलकिपर दीप कार्कीलाई बिट गर्दै चितवनलाई सुरुवाती अग्रता दिलाएका थिए । दोस्रो हाफको सुरुआती १० मिनेटभित्रै वीरगञ्जले बराबरी गोल फर्कायो । 

युवराज खड्काले कट्ब्याक गरेको बल अबमुबारिक युसिफलाई लागेर बाहिरिएपछि वीरगञ्जले कर्नर पाएको थियो । प्राप्त कर्नरमा वीरगंज गोल गर्न सफल रह्यो ।

६८ औं मिनेटमा चितवनले खेलमा पुनः अग्रता लियो । १९ यार्ड पर मिडफिल्डर टोरिक जेब्रीनले गरेको लेफ्ट फुटेड प्रहारले दोस्रो बारको जाली चुमेको थियो ।   जितसँगै चितवनले तीन खेलमा चार अंक जोडेको छ । दुवै खेलमा पराजित वीरगञ्ज अंकविहीन छ ।