१७औँ सिजनको इण्डियन प्रिमियर लिग (आइपिएल) को खेलाडी अक्सन यही १९ डिसेम्बरमा दुबईमा हुने भएको छ अक्सनमा १ हजार १ सय ६६ खेलाडीले नाम दर्ता गराएका छन् । जसमा ८ सय ३० भारतीय र ३ सय ३६ विदेशी खेलाडी रहेका छन् ।
अक्सनमा सहभागी २५ खेलाडीले आफ्नो प्रारम्भिक मूल्य नै २ करोड भारु राखेका छन् । जसमा सात अस्ट्रेलियन र चार भारतीय खेलाडी रहेका छन् ।
विभिन्न अन्तर्राष्ट्रिय सञ्चारमाध्यमका अनुसार प्याट कमिन्स, ट्रभिस हेड, मिचेल स्टार्क, जोश हेजलउड, स्टिभ स्मिथ, सन एबटलगायत अस्ट्रेलियन खेलाडीले प्रारम्भिक बोली २ करोड भारु राखेका हुन् । साथै, भारतीय क्रिकेटर हर्षल पटेल, केदार जाधव, शार्दुल ठाकुर, उमेश यादवलगगायतले पनि आफ्नो न्यूनतम मूल्य २ करोड भारु नै राखेका छन् ।
यस्तै, २० खेलाडीको सुरुवाती मूल्य १ करोड ५० लाख भारु रहेको छ । त्यस्तै, १६ खेलाडीले आफ्नो प्रारम्भिक मूल्य १ करोड भारु तोकेका छन् । १ हजार १ सय ५ खेलाडीले सुरुवाती मूल्य २० देखि ९५ लाख भारु राखेका छन् ।
यसपटकको आइपिएल अक्सनमा एसोसिएट राष्ट्रबाट ४५ खेलाडीको नाम दर्ता भएको छ ।
एसोसिएट राष्ट्रबाट अक्सनमा नेपाल, नामिबिया, नेदरल्याण्ड्स, स्कटल्याण्ड, यूएई र अमेरिकन खेलाडीले नाम दर्ता गराएका हुन् । आइपिएलले अक्सनमा नाम दर्ता गरेका खेलाडीको सूची भने सार्वजनिक गर्न बाँकी छ ।
आइपिएलले केही दिनमै आइपिएल अक्सनमा समावेश हुने खेलाडीको अन्तिम सूची सार्वजनिक गर्नेछ । सर्ट लिस्टमा पर्ने खेलाडीको नाम मात्र अक्सनमा सुनिनेछ । आसन्न आइपिएल अक्सनमा नेपालबाट पनि केही खेलाडीले नाम दर्ता गराएका छन् ।
दीपेन्द्रको सम्भावना उच्च
नेपालबाट सन्दीप लामिछाने, दीपेन्द्र सिंह ऐरी, कुशल मल्ल, कुशल भुर्तेललगायत खेलाडीले अक्सनमा नाम दर्ता गराएका बुझिएको छ ।
अलराउन्डर दीपेन्द्र सिंह ऐरी बिक्री हुने सम्भावना बढी छ । पछिल्लो एक वर्षमा अन्तर्राष्ट्रिय क्रिकेटमा उत्कृष्ट प्रदर्शन गरेकाले उनी आइपिएलमा बिक्री हुने सम्भावना रहेको हो ।
दीपेन्द्रले यही वर्ष एसिया कप र एसियन गेम्समा भारतविरुद्ध राम्रो प्रदर्शन गरेका थिए । साथै, उनले ग्लोबल टी–२० क्यानडामा पनि अलराउन्ड प्रदर्शन गरे । अलराउन्डरको माग उच्च भएकाले पनि आइपिएल २०२४ मा दीपेन्द्रलाई देख्न पाइने सम्भावना रहेको हो ।
हालसम्म नेपालबाट स्पिनर सन्दीप लामिछानेले मात्र आइपिएल खेलेको इतिहास छ । उनी २०१८ देखि २०२१ सम्म दिल्ली क्यापिटल्समा थिए । सन्दीपले आइपिएलमा ९ खेलमा १३ विकेट लिएका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
