न्याय परिषदले तीन न्यायाधीशमाथि कारबाही प्रक्रिया अघि बढाएको छ । परिषदको आइतबारको बैठकले जिल्ला अदालतका न्यायाधीशहरू राजकुमार कोइराला, अम्बिका निरौला र परशुराम भट्टराईमाथिको कारबाही अघि बढाउन जाँचबुझ समिति गठन गरेको हो । 

सर्वोच्च अदालतका न्यायाधीश डा. आनन्दमोहन भट्टराईको अध्यक्षतामा गठित समितिलाई विभागीय कारबाहीदेखि भ्रष्टाचार मुद्दा दायरसम्मको निर्णय गर्ने अख्तियारी दिइएको छ । 

काठमाडौं जिल्ला अदालतका न्यायाधीश राजकुमार कोइराला हाल जिम्मेवारविहीन छन् । उनीमथि कानुन व्यवसायी रुद्र पोखरेलसँग सहकारी ठगीका इच्छाराज तामाङलाई छुटाउन २ करोड रुपैयाँ घुस ‘डिल’ गरेको आरोप छ । उनको यससम्बन्धी अडियो सार्वजनिक भएको थियो । 

काठमाडौं जिल्ला अदालतकै अर्का न्यायाधीश अम्बिकाप्रसाद निरौलामाथि अपहरण मुद्दाका अभियुक्त दुर्गाबहादुर बुढाथोकीलाई उन्मुक्ति दिएको आरोप छ । 

बुढाथोकी भ्याली कोल्ड स्टोरका सञ्चालक बाबुराजा रावलको अपहरणको अभियोगमा पक्राउ परेका थिए । निरौलाको आदेशमा बुढाथोकी छुटेका थिए । 

त्यस्तै, अर्का न्यायाधीश परशुराम भट्टराईमाथि धनुषा जिल्ला अदालतमा रहँदा एक हत्या मुद्दाका आरोपितलाई प्रमाणको प्रतिकूल हुने गरी सफाइ दिएको आरोप छ ।