आज काठमाडौं उपत्यकासहित देशको पहाडी भू–भागमा आंशिक बदली रही बाँकी भू–भागमा मौसम मुख्यतया सफा रहेको जल तथा मौसम विज्ञान विभाग मौसम पूर्वानुमान महाशाखाले जनाएको छ ।  

अहिले तराईका अधिकांश स्थानमा बाक्लो हुस्सु लाग्नुका साथै शीतलहर परेको छ । झन्डै एक महिनादेखि लाग्दै आएको बाक्लो हुस्सु र पश्चिम तराईमा परेको शीतलहरका कारण तराईको जनजीवन कष्टकर बनेको छ ।  

मौसम पूर्वानुमान महाशाखाको अनुसार तराईमा अझै केही दिन बाक्लो हुस्सु हट्ने छैन । यता देशभर चिसो बढ्ने क्रम रोकिएको छैन । उपत्यकामा पनि चिसो बढ्दो छ । आज (आइतबार बिहान साढे ६ बजे) काठमाडौंको न्यूनतम् तापक्रम १ दशमलब ७ डिग्री सेल्सियस मापन भएको छ ।

आज उपत्यकाको तापक्रम शनिबारको तुलनामा घटेको हो । महाशाखाको अनुसार दिउँसो कोशी, बागमती र गण्डकी प्रदेशको उच्च पहाडी तथा हिमाली भू–भागका एक/दुई स्थानमा हल्का हिमपातको सम्भावना रहेको छ ।

आज राति कोशी, बागमती, गण्डकी र कर्णाली प्रदेशको पहाडी भू–भागमा आंशिकदेखि साधारणतया बदली रही बाँकी भू–भागमा आंशिक बदलीदेखि मौसम मुख्यतया सफा रहनेछ ।

कोशी, बागमती, गण्डकी र कर्णाली प्रदेशको उच्च पहाडी तथा हिमाली भू–भागका एक/दुई स्थानमा हल्का हिमपातको सम्भावना रहेको छ ।