क्यानडाविरुद्धको एकदिवसीय सिरिजको अन्तिम तथा तेस्रो खेलमा नेपाललाई पाँचौं सफलता मिलेको छ । नेपाललाई पाँचौं सफलता युवा अलराउन्डर कुशल मल्लले दिलाए । उनले ३६.५ ओभरमा हर्ष ठाकरलाई २९ रनमा एल्बीडब्लू धरापमा पारे ।  

क्यानडाको चौथो विकेट स्पिनर ललितनारायण राजवंशीले लिए । उनले २७औँ ओभरको अन्तिम बलमा ओपनर नवनीत धालिवाललाई ५० रनमा क्याच आउट गराए । 

क्यानडाको तेस्रो विकेट कुशल मल्लले लिए । उनले १८.१ ओभरमा निकोलस किर्तनलाई तीन रनमा क्याच आउट गराए । नेपाललाई दोस्रो सफलता तीव्र गतिका बलर आकाश चन्दले दिलाए । उनले १३औँ ओभरको अन्तिम बलमा श्रीमन्थ विजेरत्नेलाई २२ रनमा क्याच आउट गराए । नेपाललाई पहिलो सफलता आज डेब्यू गरेकका युवा तीव्र गतिका बलर हेमन्त धामीले दिलाए । 

उनले क्यानडाका ओपनर आरोन जोनसनलाई ४ रनमा पवेलियन फर्काए । हेमन्तले आफ्नो दोस्रो ओभरमै विकेट लिएका हुन् । टस हारेर ब्याटिङको निम्तो पाएको क्यानडाले यो समाचार तयार पार्दासम्म ३७ ओभरमा ५ विकेट गुमाएर १ सय ३७ रन बनाएको छ । नेपाल र क्यानडाबीचको तेस्रो खेल पनि कीर्तिपुरस्थित त्रिवि मैदानमा भइरहेको हो । 

नेपालले प्लेइङ–११ मा आज चार खेलाडी परिवर्तन गरेको छ । नेपालले आज सोमपाल कामी, आसिफ शेख, रिजन ढकाल, सूर्य तामाङलाई विश्राम दिएर कुशल भुर्तेल, आरिफ शेख, ललितनारायण राजवंशी र हेमन्त धामीलाई मौका दिएको हो ।  

सिरिज नेपालले एक खेल अगावै जितिसकेको छ । नेपालले पहिलो र दोस्रो खेल क्रमशः ७ रन तथा ४ विकेटले जितेको थियो । नेपाल आज तेस्रो खेलमा पनि जित हात पार्दै सिरिज ३–० ले ‘क्लिन स्विप’ गर्न चाहन्छ । यता पाहुना टोली क्यानडा भने अन्तिम खेलमा जित निकालेर नेपाल भ्रमणको सुखद अन्त्य गर्ने सोचमा छ ।