आइसिसी क्रिकेट विश्वकप लिग–२ अन्तर्गत त्रिकोणात्मक एकदिवसीय सिरिजमा नेपालले नामिबियालाई १ सय ३३ रनको सामान्य लक्ष्य दिएको छ ।
कीर्तिपुरस्थित त्रिवि मैदानमा टस हारेर ब्याटिङको निम्तो पाएको नेपालले ४१.१ ओभरमा १ सय ३२ रन बनायो । नेपालका लागि भीम सार्कीले ८६ बलमा दुई चौका र एक छक्कासहित सर्वाधिक ४४ रन बनाए ।
यस्तै, कुशल भुर्तेल शून्य, अनिल साह ८, आसिफ शेख चार, कप्तान रोहित पौडेल एक, भीम सार्की ४४, कुशल मल्ल १५, सोमपाल कामी दुई, गुलशन झा २१, पवन सर्राफ १२ र करण केसी १६ रनमा आउट भए ।
नामिबियाका लागि जेर्हार्ड इरास्मसले पाँच, ज्याक ब्रासवेल, रुबेन ट्रम्पलम्यानले दुई/दुई र जन निकोल लोफ्टी-इटनले एक विकेट लिए ।
गत संस्करणको लिग–२ मा नेपाल तेस्रो र नामिबिया चौथो भएको थियो । शीर्ष तीनमा पर्दा नेपालले सिधै एकदिवसीय विश्वकप छनोट खेल्न पाएको थियो । यसपटक लिग–२ मा आठवटा टिमले प्रतिस्पर्धा गर्दै छन् । जसमध्ये शीर्ष चारमा पर्ने टोलीले सन् २०२७ को एकदिवसीय विश्वकप छनोट खेल्न पाउनेछन् ।
हालसम्म नेपाल र नामिबियाले एकअर्काविरुद्ध ६ एकदिवसीय खेलमा प्रतिस्पर्धा गरेका छन् । जसमा नामिबियाले तीन र नेपालले दुई खेल जितेको छ । यी दुई टिमबीचको खेल भने वर्षाले रद्द भएको छ ।
नेपालको प्लेइङ–११ : आसिफ शेख, अनिल शाह, कुशल भुर्तेल, रोहितकुमार पौडेल (कप्तान) कुशल मल्ल, पवन सर्राफ, भीम सार्की, गुलशन झा, सोमपाल कामी, करण केसी र ललितनारायण राजवंशी ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
