आइसिसी क्रिकेट विश्वकप लिग–२ जारी सिरिजको अन्तिम खेलमा नेदरल्याण्ड्सविरुद्ध नेपालले सस्तैमा तीन विकेट गुमाएको छ । नेपालले तेस्रो विकेटको रूपमा कुशल मल्ललाई गुमाएको हो । उनी १३औँ ओभरको अन्तिम बलमा २ रनमा एल्बीडब्लू आउट भए । कुशल आर्यन दत्तको बलमा आउट भएका हुन् । 

नेपालले दोस्रो विकेटको रूपमा अनिल साहलाई गुमायो । उनी ११औँ ओभरको अन्तिम बलमा ७ रनमा बोल्ड भए । अनिललाई पनि भिभियन किङ्माले पवेलियन फर्काए । नेपालले पहिलो विकेटको रूपमा विकेटकिपर आसिफ शेखलाई गुमायो ।   

उनी ८.३ ओभरमा व्यक्तिगत १७ रनमा आउट भए । आसिफलाई पनि भिभियन किङ्माले आउट गरे । नेपालले नेदरल्याण्ड्सविरुद्ध पनि टस हारेर पहिला ब्याटिङ गरिरहेको हो । नेपालले आज प्लेइङ–११ मा दुई खेलाडी परिवर्तन गरेको छ । 

नेपालले आज सोमपाल कामी र देव खनाललाई विश्राम दिएर आरिफ शेख र गुलशन झालाई मौका दिएको छ । नेपाल आज जित निकाल्दै लिग–२ को पहिलो श्रृंखलाको सुखद अन्त्य गर्न चाहन्छ । यस सिरिजमा नेपाल र नेदरल्याण्ड्सले समान तीन म्याच खेल्दा दुईमा हार र एक/एक खेलमा जित निकालेका छन् । नेपालले पहिलो खेलमा नामिबियासँग ४ विकेटको हार बेहोर्दा दोस्रो म्याचमा नेदरल्याण्ड्सलाई ९ विकेटले हरायो ।   

तेस्रो खेलमा भने नेपालले नामिबियासँग २ विकेटको पराजय बेहोर्‍यो । यस्तै, पहिलो खेलमा नेपालसँग हारेको नेदरल्याण्ड्सले दोस्रो खेलमा नामिबियाविरुद्ध ७ विकेटको जित निकाल्यो । तर, उसले तेस्रो खेलमा नामिबियासँग २४ रनको पराजय बेहोरेको थियो ।    

हालसम्म नेपाल र नेदरल्याण्ड्सले एकदिवसीय अन्तर्राष्ट्रियमा चार खेलमा एकअर्काको सामना गरेका छन् । जसमा दुवै टिमले दुई/दुई खेल जितेको विगत छ ।  

नेपालको प्लेइङ–११ : कुशल भुर्तेल, आसिफ शेख (विकेटकिपर), अनिल साह, रोहितकुमार पौडेल (कप्तान), कुशल मल्ल, भीम सार्की, दीपेन्द्र सिंह ऐरी, गुलशन झा, आरिफ शेख, करण केसी र ललितनारायण राजवंशी ।