त्रिकोणात्मक टी–२० सिरिजमा नेदरल्याण्ड्सविरुद्ध नेपाललाई दोस्रो सफलता मिलेको छ । नेपाललाई दोस्रो विकेट युवा अलराउन्डर कुशल मल्लले दिलाए । उनले नवौँ ओभरको अन्तिम बलमा माइकल लेविटलाई ५४ रनमा आउट गरे । 

टस जितेर फिल्डिङ रोजेको नेपाललाई उत्कृष्ट सुरुवात दिलाउनेक्रममा नेदरल्याण्ड्सको पहिलो विकेट तीव्र गतिका बलर करण केसीले लिए । उनले तेस्रो ओभरको पहिलो बलमा म्याक्स ओ’दाउदलाई ४ रनमा दीपेन्द्र सिंह ऐरीको हातबाट क्याच आउट गराए । 

नेपाल र नेदरल्याण्ड्सबीचको खेल कीर्तिपुरस्थित त्रिवि मैदानमा भइरहेको हो । आजको खेलमा नेपालले प्लेइङ–११ मा दुई खेलाडी परिवर्तन गरेको छ । नेपालले विवेककुमार यादव र अविनाश बोहरालाई विश्राम दिएर तीव्र गतिका बलर प्रतिश जिसी र स्पिनर ललित राजवंशीलाई प्लेइङ–११ मा मौका दिएको हो । 

सिरिजमा पहिलो खेल हारिसकेको नेपाल दोस्रो म्याचमा उत्कृष्ट पुनरागमन गर्ने योजनामा छ । नेपालले पहिलो खेलमा मंगलबार नामिबियासँग २० रनको हार बेहोरेको थियो । 

नेपालको प्लेइङ–११ : कुशल भुर्तेल, आसिफ शेख (विकेटकिपर), रोहितकुमार पौडेल (कप्तान), कुशल मल्ल, दीपेन्द्र सिंह ऐरी, सन्दीप जोरा, गुलशन झा, सोमपाल कामी, करण केसी, ललितनारायण राजवंशी र प्रतिश जिसी ।