नयाँदिल्ली– बालाकोट हमलाबारे प्रधानमन्त्री नरेन्द्र मोदीको वक्तव्यमाथि ध्यानाकर्षण भएको भन्दै भारतको चुनाव आयोगले चुनाव अधिकारीहरुसँग रिपोर्ट मागेको छ । 

समाचार एजेन्सी पिटिआईका अनुसार, महाराष्ट्रका चुनाव अधिकारीहरुलाई आयोगले यथाशक्य छिटो रिपोर्ट सुम्पिन निर्देशन दिएको हो । 

महाराष्ट्रको लातुरमा एक चुनावी र्यालीलाई सम्बोधन गर्दै प्रधानमन्त्री मोदीले भनेका थिए, ‘म पहिलोपटक मतदान गर्न गइरहेकाहरुसँग भन्न चाहन्छु, के तपाईंको पहिलो भोट ती वीर जवानप्रति समर्पित हुनेछ, जसले पाकिस्तानमा हवाई हमला गरेका थिए ? के तपाईंको पहिलो भोट पुलवामाका सहिदहरुप्रति समर्पित हुनेछ ?’

अघिल्लो महिना नै चुनाव आयोगले आचारसंहिता जारी गर्दै चुनावी प्रचारप्रसारमा सेनाको नाम प्रयोग गर्न रोक लगाएको थियो ।