एजेन्सी– भारतमा १७ औं लोकसभाका लागि सात चरणमा भएको निर्वाचनको मत परिणाम आउन थालेको छ । ५४२ सिटका लागि भएको निर्वाचनको मतगणना बिहिबार विहानबाट सुरु भएको हो । 

यो निर्वाचनमा पहिलो पटक भिभिपिटी (भोटर भेरिफियबेल पेपर अडिट ट्रायल) को प्रयोग गरिएको छ । यसले गर्दा त्यहाँको निर्वाचन परिणाम आउन केही समय लाग्छ । यो प्रक्रिया भनेको इलेक्ट्रोनिक भोटिङ सँगसँगै पेपर भोटिङको पनि मिलान हो । यो माग त्यहाँको विपक्षी दलले मागेको हो ।

केही विपक्षी दलले त इभिएममाथि पनि आशङ्का राखेका थिए । तर, त्यहाँको निर्वाचन आयोगले यसलाई खारेज गरिदिएको छ । 

इभिएमको मतगणना गर्दा पनि भारतमा राजनीतिक दलका नेताले आफ्ना एजेन्ट मत गन्ने ठाउँमा राख्छन् । मतगणनाका लागि खटिएका अधिकारीले सपथ लिएपछि प्रत्येक मतदान केन्द्रको मत गन्छन् र एउटा क्षेत्रको जोडेर बल्ल नतिजा बाहिर ल्याउँछन् । 

सबैभन्दा पहिले पोस्टल मतपत्रको गणना हुन्छ । त्यसपछि इभिएमको । 

भारतीय निर्वाचन आयोगले जनाएअनुसार इभिएमका मत गनिसकेपछि मात्र त्यहाँ कागजी मतसँग मिलना गरिन्छ । यसको गणना चाहिँ छुट्टाछुट्टै मतदान केन्द्रमा हुन्छ । 

यो निर्वाचनमा भारतमा ३९.६ लाख इभिएम मेसिन र १७.४ लाख भिभिपिएटी मेसिनको प्रयोग गरिएको थियो ।