काठमाडौं– लोकसेवा आयोगले कर्मचारी आवेदन माग्दा आफूहरुलाई उपेक्षा गरेको भन्दै राष्ट्रिय अपांग महासंघले अनामनगरस्थित आयोगको केन्द्रीय कार्यालयमा धर्ना दिएको छ । 

आयोगले १५ जेठमा स्थानीय तहका लागि गरेको कर्मचारी विज्ञापनमा आफूहरुलाई बेवास्ता गरेकाले विरोधस्वरुप धर्ना बस्नुपरेको महासंघका वरिष्ठ उपाध्यक्ष रमेश लामाले बताए । 

‘नेपालको संविधान र निजामती ऐनमै अपांगता भएका व्यक्तिहरुका लागि पाँच प्रतिशत आरक्षणको व्यवस्था गरिएको छ,’ फरकधारसँग कुरा गर्दै लामाले भने, ‘लोकसेवा आयोगले हामीलाई बेवास्ता गरेर कर्मचारीका लागि विज्ञापन गर्यो ।

हामी चाहन्छौँ, अपांगता भएका व्यक्तिहरुको अधिकारलाई कटौती गरेर गरिएको विज्ञापनलाई आयोगले पनुर्विचार गरोस् । यो विषयसँग प्रत्यक्ष सरोकार राख्ने महानुभाव तथा सरकारका अंगहरुले आयोगलाई दबाब दिऊन् ।’

लोकसेवाले गरेको विज्ञापनलाई गैरसंवैधानिक र असमावेशी भन्दै वरिष्ठ उपाध्यक्ष लामाले संविधान र निजामती ऐनले नै सुनिश्चित गरेको अधिकारलाई लोकसेवा आयोगले कुन्ठित गर्न खोजेको आरोप लगाए । आफूहरुको मागलाई आयोगले सुन्नेमा विश्वस्त रहेको बताउँदै उनले भने, ‘लोकसेवा आयोगको ध्यानाकर्षण होस् भनेर आयोगका अध्यक्षलाई ज्ञापनपत्र बुझाएका छौँ । मलाई लाग्छ, उहाँले हाम्रो मागलाई बुझेर सम्बोधन गर्नुहुनेछ ।’

ध्यानाकर्षणपछि पनि आयोगले नसुने कडाभन्दा कडा आन्दोलमा उत्रने लामाले चेतावनी दिए । 

आफूहरुले उठाएको विषय अपांगता भएका व्यक्तिहरुको मात्र नभएर दलित, जनजाति, अल्पसंख्यकको पनि भएकाले उनीहरुसँग पनि सहकार्य गर्ने र जसरी भए पनि आफ्नो अधिकार सुनिश्चित गराएरै छाड्ने उनले बताए ।