रौतहट– भारतले बाँध बनाउँदा रौतहटका अधिकांश स्थान डुबानमा परेका थिए । तर, बाढीले अब भारतीय बाँध नै भत्काइदिएको छ । योसँगै रौतहटमा पानीको सतह घट्न थालेको छ । 

उता, बाँध फुटेर पानी भारतमा बग्न थालेपछि भारतका गाउँहरु डुबानमा पर्ने त्रास बढेको छ । 

यसअघि नेपाली अधिकारीले भारतलाई त्यो बाँधको ढोका खोल्न अनुरोध गरेका थिए । तर, भारतीय पक्षले नेपाली अनुरोधलाई बेवास्ता गरेको थियो । 

त्यो बाँधका कारण पानी गौरलगायतका स्थानमा जमेपछि ४ हजारभन्दा धेरै घरपरिवार विस्थापित भएका छन् । गौरसहित रौतहटका विभिन्न स्थानमा प्रहरी चौकी देखि स्थानीय तहका कार्यालय, अन्य कार्यालयहरु सबै डुबानमा परेका छन् । 

गौरसँग जोड्ने सबै सडक सन्जालसँग पनि सम्पर्क टुटेको छ । त्यस्तै, त्यहाँका अधिकारीहरुले कतिपय गाउँमा सम्पर्क गर्न नसकेकाले ती ठाउँको अवस्था थाहा नभएको बताएका छन् ।