Sat, 19 Oct, 2019


[कस्मिर संकट] पाकिस्तानी मन्त्रीले संसद्‌मा भने– भारतसँग कूटनीतिक सम्बन्ध अन्त्य गरौँ, 'सम्मानका लागि' युद्ध चुनौँ
फरकधार / साउन २२, २०७६

इस्लामावाद– भारतले जम्मु–कस्मिरलाई ७० वर्षदेखि दिइएको विशेष राज्यको मान्यता खारेज गर्दै त्यहाँ केन्द्रको शासन चलाउने निर्णय गरेपछि पाकिस्तानले त्यसको कडा शब्दमा आलोचना गरेको छ । पछिल्ला दिन पाकिस्तानका प्रधानमन्त्रीदेखि सेना प्रमुखसम्म भारतप्रति चेतावनीपूर्ण अभिव्यक्ति दिइरहेका छन् । 



भारत र पाकिस्तानबीच विभाजनको समयदेखि नै कस्मिरबारे विवाद चलिरहेको छ । 

भारतकै हिस्सा भए पनि यसअघि कस्मिरमा छुट्टै संविधान थियो । कस्मिरले छुट्टै राष्ट्रिय झन्डा चलाउँथ्यो, स्थायी कस्मिरवासीलाई छुट्टै नागरिकता दिन्थ्यो । अधिकांश जनता मुस्लिम भएकाले पनि कस्मिरवासी भारतसँग भन्दा पाकिस्तानसँग निकट थिए । कस्मिरको राजनीतिमा पाकिस्तानले कतै न कतै भूमिका खेलिरहेकै थियो । 

त्यसैले पनि, कस्मिरमा प्रत्यक्ष केन्द्रीय शासन चलाउने भारतको निर्णयले पाकिस्तानलाई ठूलो धक्का दिएको छ । ‘आजाद कस्मिर’को वकालत गर्ने पाकिस्तानले कस्मिर मुद्दामा आफ्नो हारको रुपमा पनि यो घटनालाई लिएको हुनुपर्छ । 

भारत सरकारको निर्णयविरुद्ध पाकिस्तानले संयुक्त राष्ट्र संघमा उजुरीसमेत हालिसकेको छ । पाकिस्तानी प्रधानमन्त्री इमरान खानले विभिन्न देशका कार्यकारीसँग कुरा गरेर आफ्नो पक्षमा लबिइङ पनि सुरु गरिसकेका छन् । यो मुद्दाले भारत–पाकिस्तानलाई आणविक युद्धको अवस्थासम्म धकेल्न सक्ने चेतावनीसमेत उनले दिएका छन् । 

यसैबीच, प्रधानमन्त्री इमरानको क्याबिनेटका एक मन्त्रीले त भारतसँग आफ्नो कूटनीतिक सम्बन्ध नै समाप्त गर्न माग गरेका छन् । भारतीय राजदूत पाकिस्तानमा र पाकिस्तानी राजदूत भारतमा रहिरहनुको औचित्य नै सकिएको भन्दै उनले ‘जब दुई देशबीच कूटनीति नै चलिरहेको छैन भने कूटनीतिक सम्बन्ध टिकाइराख्नुको के अर्थ ?’ भन्दै प्रश्न गरेका छन् । 

‘भारतका राजदूत यहाँ किन छन् ?’ आज कस्मिर मुद्दामाथि संसद्को संयुक्त सत्रलाई सम्बोधन गर्दै पाकिस्तानी विज्ञान तथा प्रविधि मन्त्री फवाद हुसेनले प्रश्न गरे, ‘हामी कूटनीतिक सम्बन्ध किन अन्त्य गरिरहेका छैनौँ ? जब दुई देशबीच कुनै डिप्लोमेसी नै चलिरहेको छैन भने हाम्रा राजदूत वहाँ (भारतमा) के गरिरहेका छन् ?’

भारतले पाकिस्तानको आत्मसम्मानमा प्रहार गरेको भन्दै मन्त्री हुसेनले भारतसँग युद्ध गर्न डराउन नहुने बताए । पाकिस्तानले अपमान र युद्धमध्ये कुनै एक चुन्नुपर्ने अवस्था आएको भन्दै उनले ‘सम्मानका लागि’ युद्ध चुन्नुपर्ने जिकिर गरे । युद्ध हारजितका लागि भन्दा पनि सम्मानका लागि लडिने भन्दै उनले सम्मानभन्दा ठूलो केही नहुने तर्क गरे । 


यस विषयसँग सम्बन्धित समाचार

यो सामाग्री सेयर गर्नुहोस्


यो पनि नछुटाउनुहोस्