एजेन्सी– भारतीय अभिनेत्री कंगना रनौट र उनकी बहिनी रंगोली तथा अभिनेत्री तापसी पन्नुबीच भइरहेको झगडा अहिले तत्काल रोकिने कुनै छाँटकाँट देखिँदैन । एक अन्तर्वार्तामा तापसी पन्नुले महिला भएर पनि कंगनाले फिल्म मिसन मंगलको समर्थन नगरेको र सहयोग नगरेको आरोप लगाएकी थिइन् । यही आरोपको अब ट्विटरबाट रंगोलीले जवाफ दिन थालेकी छिन् । 

रंगोलीले लेखेकी छिन्, ‘म्याडमले हरेक दिन कंगनाविरुद्ध निशाना लगाइरहेको देखिन्छ । किन मिसन मंगलको तारिफ गर्नु त कंगनाले ? अक्षय कुमार र विद्या बालनको फिल्ममा दुई मिनेटको रोल भएकोमा तापसीको तारिफ गर्ने ?’

उनले तापसीले अहिले पनि बच्चाजस्तो व्यवहार गरेको आरोप पनि लगाएकी छिन् । र, तापसीलाई अनुरोध गरेकी छिन्– मलाई यहाँ नै जवाफ दिनू, मिडिया बीचमा नल्याउनु । 

तापसीले आफ्नो अन्तर्वार्तामा महिलालाई महिलाले सहयोग गर्नु पर्ने बताउँदै आएकी कंगनाले आफ्नो प्रशंसा नगरेको गुनासो गरेकी थिइन् ।