काठमाडौं– नेपाली कांग्रेसमा पुनः हिन्दू राष्ट्रबारे बहस सुरु भएको छ । महामन्त्री शशांक कोइरालाले हिन्दू राष्ट्रबारे जनमत संग्रह हुनुपर्ने आवाज उठाउँदै आएका वेला कांग्रेसकै उपसभापति विमलेन्द्र निधिले नेपाल अब पुनः हिन्दू राष्ट्र हुन नसक्ने ठोकुवा गरेका छन् । 

कांग्रेसले सुरु गरेको राष्ट्रिय जागरण अभियान घोषणा कार्यक्रमबारे जानकारी दिन बिहीबार केन्द्रीय कार्यालय सानेपामा आयोजित पत्रकार सम्मेलनमा बोल्दै उपसभापति निधिले कांग्रेस हिन्दू राष्ट्रको पक्षमा नभएको प्रस्ट पारेका हुन् । 

नेतृत्व नेपाली कांग्रेसको नेतृत्वमा बनेको संविधानमा धर्म निरपेक्षता लेखिएको उल्लेख गर्दै निधिले भने, ‘राज्य धर्म निरपेक्ष छ । कांग्रेसलाई धर्म निरपेक्षता स्वीकार्य छ । हाम्रो चारतारे झन्डामा धार्मिक स्वतन्त्रता छ त्यो भनेको धर्मनिरपेक्षता हो ।’

निधिले सो विचार राख्दै गर्दा महामन्त्री कोइराला पनि सँगै थिए । उनले सोबारे केही बोलेनन् ।

असार २२ गतेदेखि सुरू भएर मंगलबार सकिएको केन्द्रीय समिति बैठकमा पनि केही केन्द्रीय सदस्यले हिन्दु राज्यबारे धारणा राखेका थिए ।