काठमाडौं– भारतको पिथौरागढमा तीन नेपालीको हत्या गरिएको छ । उनीहरु मजदूरीका लागि भारत गएका थिए । 

हत्या हुनेमा बैतडीका हरे बोहरा, बीरा बोहरा र काशी बोहरा छन् । उनीहरु बैतडी पुर्चौंडी नगरपालिकाका हुन् । हरे र बीर सहोदर दाजुभाइ हुन् । उनीहरुको हत्या भएको बैतडी जिल्ला समन्वय समितिका उपप्रमुख धनबहादुर बोहोराले पुष्टि गरेका छन् । 

उनीहरुमाथि धारिलो हतियारले प्रहार गरेर हत्या भएको थियो । तर, हत्या कसले गरेको हो भन्ने खुल्न सकेको छैन । 

उनीहरु डेढ वर्षअघि देखि पिथौरगढको सिलौल मड भन्ने ठाउँमा मजदूरी गरिरहेका थिए । उनीहरुको शव पिथौरगढको जिल्ला अस्पतालमा राखिएको छ । हरे बोहराकी श्रीमती फरार रहेकाले यो हत्यामा उनको संलग्नता भएको हुनसक्ने आशंका चाहिँ गरिएको छ ।