कास्की– नेपाली कांग्रेसका सभापति शेरबहादुर देउवाले शनिबार पोखरामा भारतले प्रधानमन्त्री ओलीसँग सल्लाह गरेर नै नक्सा छापेको हो भन्ने अभिव्यक्ति दिएपछि यसले राजनीतिक वृत्तमा ठूलो तरंग पैदा गरेको छ । 

आइतबार देउवाको यो अभिव्यक्तिको जवाफ दिँदै पोखरा नै पुगेर सरकारका प्रवक्ता, सन्चार सूचना तथा प्रविधिमन्त्री गोकुल बाँस्कोटाले राष्ट्रप्रेमको विषयमा सरकारको अभिव्यक्ति नफेरिने बताएका छन् । 

‘शेरबहादुर देउवाजीलाई स्पष्ट बनाउन चाहन्छु, देशभक्तिको विषयमा हाम्रो बोली फेरिँदैन,’ बाँस्कोटाले भने, ‘नाकाबन्दीका बेला उहाँहरु एक शब्द बोल्न नसक्ने, म्याउँ पनि गर्न नसक्ने अनि अहिले ठूल्ठूलो ढाडे बनेर कुर्लने ?’ उनले चुनावको समयमा आएर देउवाले यो अभिव्यक्ति दिएकोमा पनि रोष प्रकट गरे ।

यतिमात्र होइन, बाँस्कोटले टनकपुर सन्धी पनि आफूहरुले नर्बिसिएको बताए । उनले चुनावको यो समयमा देउवाको यस्तो अभिव्यक्ति आउनु शंकास्पद मात्र नभएर चुनावी माहोल बिथोल्न यस्तो भनेको समेत बताए । ‘प्रधानमन्त्रीज्यूले बोलाउनु भएको सर्वदलीय बैठकमा त उहाँले यसबारे कुनै विमती राख्नु भएको थिएन, नि,’ उनले भने, ‘अनि अहिले कहाँबाट यस्तो आरोप लाग्यो ?’