नेपालगन्ज— ट्रकले बालिकालाई ठक्कर दिएपछि आइतबार कोहलपुरमा स्थानीय र प्रहरीबीच ढुंगा हानाहान हुँदा डिएसपी हेमबहादुर शाही घाइते भएका छन् ।  

आन्दोलन अनियन्त्रित बनेको छ । स्थानीय र प्रहरीबीच ढुंगा हानाहान जारी छ । प्रहरीले हवाई फायर र अश्रु ग्यास प्रहार गर्दा पनि स्थिति नियन्त्रणमा आउन सकेको छैन ।

केही स्थानीय पनि घाइते छन् । त्रिभुवन उच्च माध्यमिक विद्यालयमा अध्ययनरत प्रकृति चन्दलाई ट्रकले ठक्कर दिएपछि आक्रोशित विद्यार्थीले ट्रकमा आगजनी गरेका थिए ।

प्रहरीले ट्रकमा आगजनी गरेको भन्दै विद्यालयमा गएर विद्यार्थी र शिक्षकलाई नियन्त्रणमा लिई कुटपिट गरेपछि आन्दोलन चर्केको हो ।

विद्यार्थीको प्रदर्शन चर्किएपछि बाँकेमा कर्फ्यू लागेको छ । 

कोहलपुरका केन्द्र बनाएर उत्तरतर्फ नौबस्ता, दक्षिणतर्फ पिपरीचाेकसम्म, पश्चिमतर्फ किरण खोला र पूर्वतर्फ रोहीनी खोलासम्म लागु हुनेगरी कर्फ्यू लगाइएको निमित्त प्रमुख जिल्ला अधिकारी कृष्णकान्त भट्टराईले जानकारी दिए ।