काठमाडौं– यातायात व्यवस्था विभागले ट्राफिक नियम उल्लंघन गर्नेलाई ५ हजार रुपैयाँ जरिवाना गर्ने प्रस्ताव गरेको छ । संघीय सवारी तथा यातायात व्यवस्था ऐनको मस्यौदामा यो कुरा उल्लेख गरिएको छ ।
 
अहिले जरिवाना थोरै भएकले लापरबाही बढिरहेको भन्दै विभागले जरिवाना बढाउन लागेको हो । विभागले संघीय सवारी तथा यातायात व्यवस्था ऐनको सन्दर्भमा सातै प्रदेशका मन्त्रालयका सचिव र विभागीय मन्त्रीहरूसँग यही १३ र १४ गते काठमाडौंमा छलफल गर्दै छ ।

विभागले प्रदेश सरकारसँग छलफल गरेर ऐनको ड्राफ्ट भौतिक पूर्वाधार तथा यातायात मन्त्रालयमा पठाउने तयारी गरिरहेको छ । मन्त्रालयले सम्बन्धित मन्त्रालय र स्टेक होल्डरहरूसँग राय–सुझाब लिएर मस्यौदा संसदमा पठाउँछ, संसदले अनुमोदन गरेपछि ऐन लागू हुन्छ ।

यो ऐन लागू भए लेनक्रस, ओभर स्पिड, जिकज्याकलगायत सामान्य कसुरमा ५ हजार जरिवाना लगाउन पाउनेछ । अहिले ट्राफिक नियम उल्लंघन गरे ट्राफिक प्रहरीले कसुर हेरेर ५ सय देखि १५ सयसम्म जरिवाना लिने गरेको छ ।