काठमाडौं– युएईबाट आएका धादिङका कोरोनाभाइरस संक्रमित युवा पनि निको भएका छन् । कोरोनाभाइरस संक्रमण भएको २८ दिनपछि उनी निको भएका हुन् । 

योसँगै नेपालमा ६ जनाले कोरोनाभाइरस जितेका छन् । टेकु अस्पतालमा उपचार गराइरहेका उनलाई आज डिस्चार्ज गर्ने तयारी रहेको छ ।

उनलाई १२ चैतमा कोरोनाभाइरस संक्रमण भएको पुष्टि भएको थियो ।

योसँगै टेकु अस्पतालमा तीन जना कोरोनाभाइरस संक्रमित ठिक भइसकेका छन् । यसअघि नेपालमा भेटिएका पहिलो र दोस्रो कोरोनाभाइरस संक्रमित युवा र युवती पनि ठिक भएर फर्किइसकेका छन् ।

नेपालमा अहिलेसम्म ४२ जनामा कोरोनाभाइरस संक्रमण देखिएको छ । अन्य सबैको अस्पतालमा उपचार भइरहेको छ । नेपालमा अहिलेसम्म सबैभन्दा धेरै उदयपुरमा २४ जना कोरोनाभाइरस संक्रमित भेटिएका छन् ।