एजेन्सी– सिंगापुरमा तीव्र गतिमा बढिरहेको कोरोनाभाइरस संक्रमणलाई मध्यनजर गर्दै विशेष व्यवस्था गर्न थालिएको छ । सिंगापुरमा आइसोलेसनमा राख्ने व्यक्तिहरुका लागि अस्थायी सुविधाहरुको पनि बन्दोबस्त गर्न थालिएको छ ।

सिंगापुरमा प्रवासी मजदूरहरुको संख्या बढी भएको र उनीहरुमा कोरोनाभाइरस संक्रमण फैलिएको आशंका गरेकाले निकै चिन्ताजनक अवस्था भएको बताइएको छ । ५७ लाख मानिस बसोबार गर्ने सिंगापुरमा १२ हजार मानिसमा संक्रमण पुष्टि भइसकेको छ । 

समाचार एजेन्सी रोयटर्सको समाचारअनुसार एशियामा सबैभन्दा बढी प्रभावित देशमध्ये एक हो, सिंगापुर । तर, संक्रमितको संख्या बढिरहे पनि सिंगापुरमा कोभिड १९ का कारण ज्यान गुमाउनेको संख्या अरु देशको तुलनामा निकै कम छ । अहिलेसम्म सिंगापुरमा १२ जनाको कोभिड १९ का कारण निधन भएको छ । त्यहाँ अहिले २४ जना आइसियूमा छन् ।

त्यहाँको आइसोलेसन सेन्टरमा संक्रमितले आफैं आफ्नो स्वास्थ्य परीक्षण गर्न सक्ने पनि व्यवस्था गरिएको छ । 

त्यहाँ रोबोटले संक्रमितहरुलाई खाना दिने गर्छ । अनि प्रत्येक कोठामा टेलिकन्फ्रेन्सको व्यवस्था पनि गरिएको छ । अर्को एक ‘रोबोट डग’को पनि सिंगापुरमा परीक्षण गर्न थालिएको छ ।