कोरोनाभाइरस सुरुमा मानिसमा नै संक्रमण भएको चीनको वुहान सहरमा देखियो । अहिले यो भाइरसका कारण संसार निकै आत्तिएको छ । विश्वका अधिकांश देशमा दैनिक कोरोना संक्रमित भेटिएका छन् । 

तर, चीको हुबेई प्रान्तमा ३२ दिन यता कोही पनि नयाँ संक्रमित भेटिएका छैनन् । चिनियाँ सरकारी मिडिया शिन्ह्वाका अनुसार त्यहाँ अहिले जनजीवन अब सामान्य हुँदै गएको छ । 

चीनले कोरोनाभाइरस संक्रमण रोक्नका लागि लामो समयदेखि निकै मेहनेत गरेको छ । चीनमा कम्तिमा पनि ७५ दिन लकडाउन गरिएको थियो । पूरै चीनमा चाहिँ आज दुई जना नयाँ कोरोनाभाइरस संक्रमित भेटिएका छन् । योसँगै चीनमा संक्रमितको संख्या अब ८२ हजार ८ सय ३३ पुगेको छ । त्यहाँ कोरोनाभाइरसका कारण ४ हजार ६ सय ३३ जनाले ज्यान गुमाएका छन् ।

त्यसो त केही आलोचकहरुले चीनले तथ्याङ्क लुकाएको आरोप लगाइरहेका छन् । अर्कोतिर चीनले यी सबै आरोपलाई अस्वीकार गर्दै आफ्नो अर्थतन्त्र फेरि माथि ल्याउने प्रयास सुरु गरिसकेको छ ।