काठमाडौं– नेपाली सेनाले अवकाशप्राप्त उपरथीसहित नौजनालाई आर्थिक अनियमिता गरेको ठहर गर्दै कारबाही गर्ने निर्णय गरेको छ । यसरी कारबाहीमा पर्नेमा अवकाशप्राप्त उपरथी सुधीर श्रेष्ठसहित नौजना छन् । 

नेपाली सेनाले एक विज्ञप्ति जारी गरी सो कारबाहीबारे जानकारी गराएको छ । कारबाही परेकाहरुमाथि सैनिक हवाई महानिर्देशनालय, गौचरमा कार्यरत रहँदा सम्पत्ति र अनुशासन तथा आचरण सम्बन्धी कसूर गरेको अभियोग छ ।  

सैनिक ऐन २०६३ बमोजिम एकजना अवकाश प्राप्त पाइलट उपरथीलाई नसिहत तथा रकम असुल उपर, आठजना सैनिक अधिकृतहरुलाई सचेत र एकजना अधिकृत तथा ९ नौजना अन्य दर्जाहरुलाई सफाइ दिने गरी फैसला गरिएको विज्ञप्तिमा उल्लेख छ । 

सैनिक हवाई महानिर्देशनालय भएको उक्त घटनाको सत्यतथ्य छानबिन गर्न सैनिक मुख्यालयले रथीको अध्यक्षतामा कोर्ट अफ इन्क्वायरी बोर्ड गठन गरेको थियो । उक्त बोर्डको प्रतिवेदनका आधारमा अदालतले कारवाही गर्ने निर्णय गरेको हो ।