काठमाडौं– नेपाली कांग्रेसका सांसद गगन थापाले रूकुम घटनाबारे छानबिनका लागि सर्वदलीय संसदीय छानबिन समिति गठन गर्न सभामुखसँग माग गरेका छन् । 

सोमबार प्रतिनिधिसभा बैठकमा बोल्दै सांसद थापाले रूकुम पश्चिमको चौरजहारी नगरपालिका वडा नम्बर ८ मा भएको घटनाबारे छानबिन गर्न सर्वदलीय संसदीय छानबिन समिति गठन गर्नुपर्ने माग राखेका हुन् । 

दलितका हकअधिकार र कानुन बनायौँ भनेर गर्व गरिरहँदा रूकुमको नरसंहारले सबैको अनुहारमा कालो पोतिएको सांसद थापाको भनाइ थियो । उक्त घटनामा राज्यको लाचारीलाई संसदले टुलुटुलु हेरेर बस्न नमिल्ने उनले बताए ।

उक्त घटनामा जाजरकोटका नवराज विक उनका पाँच जना साथीको मृत्यु भएको थियो भने एकजना अझै बेपत्ता छन् ।