शिक्षा, विज्ञान तथा प्रविधि मन्त्रालयले शिक्षण संस्था सञ्चालन नभएको अवधिको शुल्क नलिन निजी विद्यालयलाई निर्देशन दिएको छ ।
मन्त्रालयले सोमबार एक विज्ञप्ति जारी गर्दै लकडाउनको अवधिमा विद्यालय बन्द गरिएको भन्दै बन्द गरिएको समयको शुल्क नलिन निर्देशन दिएको हो ।
मन्त्रालयले निजी विद्यालयको छाता संस्था प्याब्सन, एनप्याब्सनलाई आफ्नो विज्ञप्तिमार्फत शुल्क नलिन सचेत गराएको छ ।
आइतबार निजी विद्यालयका छाता संस्था प्याब्सन र एनप्याब्सनले गत वर्षको बाँकी र शैक्षिक सत्र २०७७ को शुल्क बुझाउन अपिल गरेका थिए । विज्ञप्तिमा प्याब्सन, एनप्याब्सनले गरेको अपीलप्रति मन्त्रालयको ध्यानाकर्षण भएको उल्लेख छ ।
चैतदेखि शिक्षण संस्था बन्द छन् ।
निजी विद्यालय सञ्चालकले लकडाउनको अवधिमा सरकारले कुनै राहत नदिएकाले शुल्क उठाउनु परेको जिकिर गरेका थिए ।
कुनै शुल्क लिन नपाउने हो भने अनलाइन कक्षा बन्द गर्नु र विद्यालयमा ताला लगाउनुको विकल्प नरहेको एनप्याब्सन काठमाडौंका प्रमुख सल्लाहकार विष्णु पराजुलीले बताए ।
उनका अनुसार सरकारको निर्देशनले निजी विद्यालयमा कार्यरत करिब ४ लाखको रोजगारी पनि संकटमा परेको छ ।
विद्यालयहरूले भोग्नु परेको समस्या बारेमा छलफल गर्न सकिने मन्त्रालयले जनाएको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।