Fri, 03 Jul, 2020


रुकुम घटनाः वडाध्यक्षसहित २३ जनालाई थुनामा पठाउन अदालतको आदेश, युवतीकी आमालाई धरौटीमा छोडियो
फरकधार / असार ११, २०७७
घटनामा मारिएका नवराज विक ।

पश्चिम रुकुमको चौरजहारीको सोती घटनामा २३ जनालाई अदालतले पुर्पक्षका लागि थुनामा पठाउन आदेश दिएको छ । यी २३ जनामा त्यहाँका वडाध्यक्ष पनि परेका छन् । 



प्रहरीले घटनामा संलग्न भएको भन्दै २७ जनालाई प्रतिवादी बनाएको थियो । यीमध्ये वडाध्यक्ष डम्बरबहादुर मल्लसहित २३ जनालाई पुर्पक्षका लागि थुनामा पठाउन अदालतले आदेश दिएको हो । 

यसअघि घटनामा संलग्न भएको आशंकामा पक्राउ गरिएकी युवतीकी आमालाई चाहिँ अदालतले एक लाख धरौटीमा छोड्न आदेश दिएको छ ।

त्यस्तै, सोही ठाउँका इन्द्रबहादुर मल्ल, तुलबहादुर मल्ल र दीपेन्द्र चन्द चाहिँ साधारण तारेखमा छुटेका छन् ।

यसअघि १ असारमा नै अदालतले १७ वर्षकी किशोरी र उनका भाइलाई नाबालक भएको भन्दै सुधार गृह पठाउन अदालतले आदेश दिइसकेको थियो । 

५ असारदेखि सुरु भएको थुनछेक बहस अब सकिएको छ ।

१० जेठमा जाजरकोटका नवराज विकसहित १८ जना नवराज विकको प्रेमिका भनिएकी युवतीलाई लिन चौरजहारी पुग्दा उनीहरुमाथि गाउँलेहरुले आक्रमण गरेका थिए । घटनामा नवराज विकसहित ६ जनाले ज्यान गुमाएका थिए । उनीहरु सबैको शव भेरी नदीमा पाइएको थियो ।


फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक ट्विटरमा पनि जोडिन सक्नुहुन्छ ।


यो सामाग्री सेयर गर्नुहोस्


यो पनि नछुटाउनुहोस्