Fri, 03 Jul, 2020


मन्त्रिपरिषद् हेरफेरको तयारी, भीम रावलले अस्वीकार गरे मन्त्री बन्ने प्रस्ताव
फरकधार / असार ११, २०७७

सत्तारुढ नेपाल कम्युनिस्ट पार्टी (नेकपा)को अहिले स्थायी कमिटी बैठक चलिरहेको छ । बुधबार सुरु भएको बैठकमा नेकपाका दुई अध्यक्ष केपी शर्मा ओली र पुष्पकमल दाहाल प्रचण्डले एकअर्कालाई कडा आलोचना गरेका छन् । 



एकातिर स्थायी कमिटी बैठकमा नेताहरुबीचको मतभेद स्पष्ट देखिएको छ भने अर्कोतिर प्रधानमन्त्री केपी शर्मा ओली अब मन्त्रिपरिषद् विस्तार तथा हेरफेर गर्ने तयारीमा जुटेका छन् । 

यसका लागि उनले पार्टीका अर्का अध्यक्ष पुष्पकमल दाहाल प्रचण्डसँग छलफल गरिसकेको उनीनिकट एक नेताले बताएका छन् ।

प्रधानमन्त्री ओली निकट ती नेताका अनुसार प्रधानमन्त्री केपी शर्मा ओलीले अहिले खाली रहेका दुई मन्त्रालय सूचना तथा सन्चार र सहरी विकास मन्त्रालयमा अबको सातामा नै दुई मन्त्री नियुक्ती गर्दै छन् । यही समयमा नै अहिलेका केही मन्त्रीहरुलाई हटाउने तयारी प्रधानमन्त्री ओलीले गरेको र त्यसका लागि पार्टीका अर्का अध्यक्ष केपी शर्मा ओलीसँग छलफल भइसकेको दाबी ती नेताको छ ।

 

भीम रावलले अस्वीकार गरे मन्त्री बन्ने प्रस्ताव

नेकपामा स्थायी कमिटी सदस्यसमेत रहेका ती नेताका अनुसार प्रधानमन्त्री केपी शर्मा ओलीले नेकपा नेता भीम रावललाई सूचना तथा सन्चार मन्त्रालयको जिम्मेवारी लिन प्रस्ताव गरेका थिए । तर, भीम रावलले उनको यो प्रस्तावलाई अस्वीकार गरेका छन् । 

पछिल्लो समय पार्टी नेतृत्व र सरकारप्रति कडा आलोचकका रुपमा देखिएका रावलले अहिलेको सरकारमा आफू सहभागी नहुने यसअघि पनि बताएका थिए । ‘उहाँले प्रधानमन्त्री ओलीको प्रस्तावलाई अहिले तत्कालका लागि अस्वीकार गर्नु भएको हो,’ ती नेताले फरकधारसँग भनेका छन् । 

केही समययता प्रधानमन्त्री ओलीले पार्टीमा फरक र आलोचक विचार राखिरहेका नेताहरुलाई मन्त्री बनाउन थालेका छन् । यसको उदाहरणका रुपमा उनले पछिल्लो पटक मन्त्रिपरिषद् हेरफेर गर्दा घनश्याम भुसाल र योगेश भट्टराईलाई मन्त्री बनाउनु रहेको बुझाइ नेकपा भित्रै छ ।

तर, रावलले यो प्रस्ताव अस्वीकार गरेपछि प्रधानमन्त्री ओलीले सूचना तथा सन्चारका लागि कसलाई जिम्मेवारी दिने भन्ने निक्र्योल निकालिसकेका छैनन् ।

पछिल्ला केही दिन यता यो मन्त्रालयका लागि नेकपाका दुई सांसद विशाल भट्टराई र राजेन्द्र गौतमले दौडधूप बढाउन थालेका छन् । भट्टराईले सूचना तथा सन्चारलाई प्राथमिकतामा राखेका छन् भने गौतमले सहरी विकास मन्त्रालयलाई । उनीहरुले यही विषयमा छलफल गर्न केही दिनअघि प्रधानमन्त्री ओली, नेकपा नेता माधवकुमार नेपाल तथा रक्षामन्त्री ईश्वर पोखरेलसँग भेटघाट गरेको स्रोतको दाबी छ ।

 

वनमन्त्री शक्ति बस्नेत हटाउन खोज्दै छन् ओली

ती नेताका अनुसार प्रधानमन्त्री केपी शर्मा ओलीले अहिलेका केही मन्त्रीहरुलाई पनि हेरफेर गर्ने तयारी गरेका छन् । त्यसमा सबैभन्दा पहिलो नम्बरमा वनमन्त्री शक्तिबहादुर बस्नेत रहेको बुझिएको छ । पार्टी अध्यक्ष प्रचण्ड पनि यसमा सकारात्मक रहेको ती नेताले बताएका छन् । उनका अनुसार प्रधानमन्त्री केपी शर्मा ओलीले अहिले खासै काम गर्न नसकेको रुपमा बस्नेतलाई लिएका छन् । 

‘प्रचण्ड कमरेडसँग प्रधानमन्त्री ओलीले वनमन्त्री बस्नेत र खानेपानी मन्त्री विना मगरलाई पनि फेर्ने कि भन्ने सल्लाह गर्नुभएको छ,’ ती नेताले फरकधारलाई भने, ‘बस्नेतको सन्दर्भमा प्रचण्ड कमरेड सकारात्मक देखिए पनि विना मगरलाई हटाउन नहुने कुरा उहाँले राख्नु भएको छ ।’

वनमन्त्री बस्नेतबाट काम हुन नसकेको भन्दै प्रधानमन्त्री ओलीले अध्यक्ष प्रचण्डलाई कुरा राखेपछि यो मन्त्रालयले फेरि पनि पूर्वमाओवादीलाई नै दिने तयारी रहेको बुझिएको छ ।

 

गृहमन्त्री थापालाई हटाउन प्रचण्डको प्रस्ताव

मन्त्रिपरिषद्मा हेरफेर ल्याउने भएपछि प्रधानमन्त्री केपी शर्मा ओलीलाई फेरि एक पटक गृहमन्त्री रामबहादुर थापा बादललाई हटाउनु पर्ने प्रस्ताव पुष्पकमल दाहाल प्रचण्डले राखेका छन् । 

पछिल्लो समय विभिन्न विषय तथा मुद्दाहरुमा बादलले आफूलाई भन्दा प्रधानमन्त्री ओलीलाई साथ दिएको बुझाइ प्रचण्डको छ । पार्टीमा नयाँ र छुट्टै गुट निर्माणमा पनि बादल लागिरहेकाले उनलाई आफ्नो प्रतिस्पर्धीका रुपमा प्रचण्डले हेर्न थालेका छन् । ‘यही कारण पनि हुनसक्छ, बादललाई हटाउनु पर्ने प्रस्ताव प्रचण्डको छ,’ ती नेताले भनेका छन् ।

बुधबारको स्थायी कमिटी बैठकमा प्रचण्ड र ओलीबीचको घोचपेचका कारण अब मन्त्रिपरिषद् फेरबदल आगामि साता नै नहोला कि भन्ने अनुमान पनि गरिएको छ । ‘प्रधानमन्त्री ओलीको तयारी हेर्दा यही साता नै नयाँ मन्त्रीहरु नियुक्त हुनसक्ने सम्भावना बढेको छ,’ ती नेताले भने ।


फरकधारमा प्रकाशित कुनै समाचारमा तपाईंको गुनासो भए हामीलाई news@farakdhar.com मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक ट्विटरमा पनि जोडिन सक्नुहुन्छ ।


यो सामाग्री सेयर गर्नुहोस्


यो पनि नछुटाउनुहोस्