काठमाडौं– म्यानपावर कम्पनी नवीकरणमा सहजीकरण गरिदिन संसदीय समितिले सरकारलाई निर्देशन दिएको छ । संघीय संसदको उद्योग तथा वाणिज्य र श्रम तथा उपभोक्ता हित समितिले यस्तो निर्देशन दिएका हो ।

समितिले शुक्रबार यसबारे श्रम, रोजगार, तथा सामाजिक सुरक्षामन्त्री रामेश्वर राय यादव र म्यानपावर व्यवसायीसँग छलफल गरेको थियो । सर्वपक्षीय छलफलपछि समितिले यस्तो निर्देशन दिएको हो ।

म्यानपावर व्यवसायीले प्रत्येक वर्ष कम्तीमा एक सय कामदार पठाएको प्रमाणित नभए इजाजत नवीकरण नहुने व्यवस्थाको विरोध गर्दै आएका छन् । इजाजत नवीकरणका लागि मन्त्रालयले असार मसान्तसम्मको म्याद दिएको छ । 

म्यानपावर व्यवसायीको मागअनुसार समितिले नवीकरणको म्याद सकिन चार दिनअघि नवीकरणमा सहजीकरण गरिदिन निर्देशन दिएको हो ।