नेपाल उद्योग वाणिज्य महासंघको आगामी चुनावका लागि व्यवसायी चन्द्र ढकालले वरिष्ठ उपाध्यक्षसहितका पदमा प्यानलसहित उम्मेदवारी घोषणा गरेका छन् । यो प्यानलबाट ढकाल वरिष्ठ उपाध्यक्ष पदको उम्मेदवार हुने बुधबार आयोजित कार्यक्रममा घोषणा गरेका हुन् ।
ढकाल समूहले बुधबार प्यानलसहितको उम्मेदवारी घोषणा गर्दै आफ्नो प्यानल विजयी हुने दावी गरेको छ । ढकाल हाल महासंघको उपाध्यक्ष छन् । ढकाल समूहबाट जिल्ला–नगर उपाध्यक्षमा गुणनिधि तिवारी उठ्दैछन् । उनी हाल महासंघको प्रदेश ५ कमिटीको अध्यक्ष छन् ।
वस्तुगत उपाध्यक्षमा भने वर्तमान उपाध्यक्ष उमेशलाल श्रेष्ठ नै दोहोरिने भएका छन् । यसैगरी एशोसिएट उपाध्यक्षमा ढकाल समूहले रामचन्द्र संघईलाई उम्मेदवार बनाउने घोषणा गरेको छ ।
हालका वरिष्ठ उपाध्यक्ष शेखर गोल्छाले अर्को प्यानललाई सहयोग गर्न खोजेको भन्नेतर्फ संकेत गर्दै ढकालले चुनाव जितेर गोल्छाकै टिमको सदस्य हुने बताए ।
वरिष्ठ उपाध्यक्ष स्वतः अध्यक्ष बन्नुपर्छ भन्ने पक्षमा आफू उभिएको भन्दै उनले आफूले यस विषयमा नलागेको भए अवस्था फरक हुने बताए । गोल्छाले वरिष्ठ उपाध्यक्षका अर्का उम्मेदवार किशोर प्रधान समूहलाई समर्थन गर्ने संकेत गरिसकेका छन् । ढकालले भने गोल्छालाई विगत सम्झन भनेका छन् ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।
