श्रीमती हत्या अभियोगमा जेल परेका सशस्त्र प्रहरीका पूर्वडिआइजी रन्जन कोइराला आज जेलमुक्त भएका छन् । उनी ८ वर्ष ६ महिना कैद सजाय भुक्तान गरेर जेलमुक्त भएका हुन् ।

कोइराला हात हल्लाउँदै डिल्लीबजार कारागारबाट बाहिरिँदा उनकी प्रेमिका तारा रेग्मी बाहिर प्रतिक्षा गरिहेकी थिइन् ।

कोइरालाको यस रिहाइलाई सामाजिक सञ्जालमा धेरेले आलोचना गरिहेका छन् ।

एक जना ट्विटर प्रयोगकर्ताले लेखेका छन्, ‘श्रीमतीको हत्यारा जेलबाट छुट्दा गणतन्त्रको योद्धा छुटे जसरी हात हल्लाउँदै बाहिरिन्छ । हत्याकाण्ड मच्चाउन प्रेरित गर्ने महिला उसको स्वागतमा कारागारको गेटमा कार लिएर पुग्छिन् । समाजमा नयाँ मानक बनेको हो ?’

सर्वोच्च अदालतले १५ असारमा कोइरालाको सजाय घटाउँदै ८ वर्ष ६ महिना कायम गरेको थियो । श्रीमती गीता ढकालको हत्या गरेको मुद्दामा प्रधानन्यायाधीश चोलेन्द्रशमशेर जबरा र तेजबहादुर केसीको इजलासले सजाय घटाउने फैसला गरेको थियो ।