पर्सामा सोमबार विहान थप ७३ जनामा कोरोनाभाइरस संक्रमण पुष्टि भएको छ । वीरगन्जको नारायणी अस्पताल प्रयोगशालामा गरिएको परीक्षणमा सेना, प्रहरी र पत्रकारसहित थप ७३ जनामा कोरोनाभाइरस संक्रमण पुष्टि भएको हो ।

सोमबार थपिएका ७३ संक्रमितमा १२ जना महिला रहेका छन् । 

अस्पतालका अनुसार प्रहरीका दुई जना, सेनाका एक जना र एक जना पत्रकार पनि कोरोनाभाइरस संक्रमित भएका छन् ।

आज थपिएका संक्रमितसँगै पर्सामा अब कोरोना संक्रमितको संख्या ५ सय ८० पुगेको छ । 

पछिल्ला केही दिनयता कोरोनाभाइरस संक्रमित थपिन थालेपछि पर्सा जिल्लाले जिल्लाभर निषेधाज्ञा लगाएको छ ।