अफगानिस्तानको घाज्नी प्रान्तमा शनिबार प्रहरी चौकीलाई लक्षित गरी भएको कार बम बिस्फोटमा सात जनाको मृत्यु हुनुका साथै १६ जना घाइते भएका छन् ।
गृह मन्त्रालयका प्रवक्ता तारेक एरियनका अनुसार सशस्त्र विद्रोहीहरुले विस्फोटक पदार्थले भरिएको कार घाज्नी सहरको बाहिरी इलाकामा रहेको कोटाल रावा प्रहरी चौकीमा साँझ ७.४५ बजे विस्फोट गराएका थिए ।
प्रवक्ता तारेकले उक्त घटनाको अनुसन्धान थालिएको जानकारी दिए ।
प्रान्तीय सरकारका प्रवक्ता वाहिदुल्लाह जुमाजादाले पनि घटनाको पुष्टि गर्दै आक्रमणकारीहरु प्रहरी चौकीभित्र प्रवेश गर्न खोजेका तर प्रहरीको प्रतिकारले उनीहरुको त्यो प्रयास सफल हुन नपाएको बताए ।
उक्त आक्रमणको घटना ४ सय जना विवादास्पद तालिबान बन्दीका विषयमा निर्णय गर्न लोया जिर्गा अर्थात् समाजका ज्येष्ठ एवं प्रबुद्ध वर्गको बैठक बसिरहेका समयमा भएको छ । लोया जिर्गा बैठकमा अफगानिस्तानका विभिन्न भागबाट आएका तीन हजारभन्दा बढी सदस्यको सहभागिता छ ।
घानी सरकारले अफगानिस्तानमा युद्धरत तालिबानका ५ हजार १ सय लडाकुलाई जेलमुक्त गरिसकेको छ । तर, तालिबानले जेलमा अझै बन्दी अवस्थामा रहेका ४ सय लडाकुलाई तत्काल रिहाई गर्नुपर्ने माग गर्दै आएको छ । सरकारको भनाइमा यी लडाकु ट्रक बम आक्रमण, अपहरण र नागरिक हत्याका आरोपी हुन् ।
सरकार र विद्रोही तालिबानबीच लडाकुको रिहाईसँगै अन्तर–अफगान संवाद हुने र वर्षौंदेखिको गृहयुद्ध समाप्त हुने अपेक्षा गरिएको छ ।
यसैबीच, लोया जिर्गाले अफगानी जेलमा बन्दी ४ सय लडाकुलाई मुक्त गर्न सिफारिस गरेको छ ।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।