काठमाडौं– धादिङको नीलकण्ठ नगरपालिका, धुवाकोटका एक कोरोना संक्रमित पुरुषको काठमाडौंको ह्याम्स अस्पतालमा मृत्यु भएको छ । श्वासप्रस्वास र फोक्सो उपचारका लागि भर्ना भएका ३५ वर्षीय पुरुषको मृत्यु भएको हो । 

साउन २६ गते उपचारका लागि धादिङ अस्पताल पुगेका उनलाई सोही दिन धादिङ अस्पतालले काठमाडौं लैजान सुझाब दिएपछि ह्याम्स अस्पताल ल्याएर उपचार सुरु गरिएको थियो । 

सुरुमा वीर अस्पताल र शिक्षण अस्पताल गएको तर ती अस्पतालमा भर्ना गर्न नपाएपछि ह्याम्स अस्पताल लगिएको पारिवारिक स्रोतले जनाएको छ । उनको उपचारको क्रममा साउन २७ गते बिहान मृत्यु भएको थियो । मृत्युपछि स्वाब परीक्षणको रिपोर्ट आउँदा उनमा कोरोना संक्रमण पुष्टि भएको हो ।