काठमाडौं– उद्योग, वाणिज्य तथा आपूर्तिमन्त्री लेखराज भट्टले खाद्य व्यवस्था तथा व्यापार कम्पनी लिमिटेडले राष्ट्रिय विपत्तिमा खेलेको भूमिकाको प्रशंसा गरेका छन् । कम्पनी स्थापनाको प्रथम वार्षिकोत्सवका अवसरमा बोल्दै मन्त्री भट्टले कम्पनीले राष्ट्रिय विपत्तिमा सरकारको भूमिका निर्वाह गरेको बताए ।

विपत्तिको समयमा विभिन्न क्षेत्रमा खाद्यान्नलगायत सामग्री पुर्याएर सरकारको सहभागिता जनाउँदै निजी क्षेत्रका व्यवसायीलाई समेत सहयोग गर्नुपर्ने दबाब दिएको बताए ।

उनले खाद्य कम्पनी र नेसनल टेड्रिङ कम्पनीलाई गाभेर एक बनाइएको भन्दै दुवै कम्पनीका राम्रा कुराको उपयोग गरेर सेवाको गुणस्तरमा ध्यान दिन निर्देशन दिए । ‘बन्दाबन्दीको समयमा काठमाडौंमा मोबाइल भ्यानमार्फत खाद्यान्नको होम डेलिभरी सेवा सुरु गर्नु आफैँमा राम्रो हो । खाद्यान्नमा मात्र सीमित नभएर नयाँ वस्तु तथा सेवाको निरन्तरता दिनु मुख्य पाटो हो,’ उनले भने ।

यसैगरी उद्योग राज्यमन्त्री मोतिलाल दुगडले बन्दाबन्दीको समयमा मूल्य वृद्धि रोक्नमा खाद्यले ठूलो काम गरेको भन्दै निजी क्षेत्रभन्दा अगाडि बढेर सेवा प्रवाह गर्नुपर्नेमा जोड दिए । सरकारी भनेपछि उपभोक्तामा छुट्टै छाप बस्ने भन्दै सहुलियत तथा गुणस्तरीय रुपमा सेवा दिनुपर्नेमा उनले जोड दिए ।