पर्सा– वीरगञ्जका निजी अस्पतालमा कार्यरत एक सय ५० जना डाक्टरले आफूहरुको माग पूरा नभए राजीनामा दिने चेतावनी दिएका छन् ।  

आफूहरुका माग पूरा नभएकोले मङ्गलबारदेखि काममा हाजिर नहुने गरी राजीनामा दिने निर्णय गरिएको मेडिकल अफिसर एसोसिएशन अफ वीरगञ्ज सङ्घर्ष समितिले जनाएको छ ।  

उनीहरुले सात दिनभित्र माग पूरा गर्न भन्दै गएको भदौ १ गते अल्टिमेटम दिएका थिए । जिल्ला प्रशासन कार्यालय, नेपाल चिकित्सक सङ्घ, एसोसियसन अफ प्राइभेट हस्पिटल इन्स्टिच्युसन अफ नेपाल र आफू कार्यरत अस्पतालमा दिएको अल्टिमेटमको म्याद मंगलबार सकिँदै छ । 

डाक्टरहरुले न्यूनतम ६५ हजार तलब हुनुपर्ने, २५ लाख रुपैयाँबराबरको स्वास्थ्य र जीवन बिमा गर्नुपर्ने, कोरोना महामारीका बेला अस्पतालमा काम गरेपछि बस्नका लागि क्वरेण्टिनको व्यवस्था अस्पतालले नै गर्नुपर्नेलगायतका माग राखेका छन् । 

सोमबार साँझसम्म माग सम्बोधन नभएपछि उनीहरुले विज्ञप्ति निकालेर मङ्गलबार सामूहिक राजीनामा दिने निर्णय भएको जानकारी गराएका हुन् ।