विगतमा विभिन्न कार्यालयबाट भिडभाडका साथ नयाँ नोट बाँड्ने गरेको नेपाल राष्ट्र बैङ्कले यसपटक नयाँ नोट वितरणलाई साँघुरो बनाउने भएको छ ।
नेपाल राष्ट्र बैङ्क मुद्रा व्यवस्थापन विभागका कार्यकारी निर्देशक रेवतीप्रसाद नेपालले विषम परिस्थितिमा विगतमा जस्तो तामझाम साथ नयाँ नोट वितरण गर्ने अवस्था नरहेको भन्दै यस विषयमा असोजभरमा आवश्यक निर्णय लिइने बताए ।

यसपालि दशैँ केही समय पछि रहेकाले अहिले नै निर्णय लिने अवस्था नभएको भन्दै उनले कोरोना कस्तो अवस्थामा पुग्छ त्यसै अनुसार निर्णय गरिने बताए । 
नेपाल राष्ट्र बैङ्कका अनुसार एक सय, पचास, पाँच सय र एक हजार रुपैयाँका नयाँ नोट आइसकेका छन् । आगामी असोज १५ सम्म पाँच, दस र बीसका नोट आउने प्रक्रियामा रहेको जनाइएको छ । 

दशैँसम्म हजार रुपैयाँको समेत गरी ५० अर्ब रुपैयाँ बराबरका नयाँ नोट आइसक्ने उनले जानकारी दिए ।