रसुवागढी भन्सार नाकामा सामान लोड गर्ने मजदुरलाई कोरोना देखिएपछि बुधबारदेखि नाका बन्द भएको छ । कामदारलाई कोरोना पोजेटिभ देखिएपछि नाका बन्द गरिएको रसुवा भन्सार कार्यालयले जनाएको छ । बन्दाबन्दीका कारण लामो समय बन्द रहेको नाका केही दिन अघिमात्र सञ्चालनमा आएको थियो । 

एक मजदुरमा संक्रमण देखिएपछि अन्य मजदुरको पनि स्वाब लिएर क्वारेन्टिनमा राखिएको कार्यालयको भनाइ छ । कामदारलाई कसरी संक्रमण भयो भन्नेबारे अनुसन्धान भइरहेको कार्यालयले जनाएको छ ।

भन्सारमा कार्यरत सवारी चालक र अन्य कामदारको स्वाब परीक्षण गरेर छिट्टै नै सामान ल्याइने कार्यालयले जनाएको छ ।  भदौ २५ गतेदेखि दैनिक ८ चिनियाँ कन्टेनर सामान भित्रिने सहमति भए पनि हाल मजदुरमा कोरोना देखिएपछि सबै काम ठप्प भएको छ ।