इन्डियन प्रिमियर लिग(आइपिएल) को यस सिजनमा दिल्ली क्यापिटल्सले दोस्रो हार व्यहोरेको छ । आइतबार राति भएको खेलमा मुम्बई इन्डियन्ससँग दिल्ली ५ विकेटले पराजित भएको हो । 

शेख जायद रंगशाला अबुधाबीमा भएको खेलमा दिल्लीले टस जितेर ब्याटिङ रोजेको थियो । पहिले ब्याटिङमा उत्रेको दिल्लीले २० ओभरमा ४ विकेट गुमाएर १६२ रन बनाएको थियो । १६३ रनको मध्यम लक्ष्य पछ्याएको मुम्बईले १९.४ ओभरमा ५ विकेट गुमाएर १६६ रन बनाउँदै जित हात पार्‍यो । 

मुम्बईको जितका लागि क्वीटन डीकक  र सूर्यकुमार यादवले अर्धशतक बनाए । डीकक ले ३६ बलमा ५३ रन बनाउँदा यादवले ३२ बलमा समान ५३ रन बनाए । इशान किशनले १५ बलमा २८ रनको योगदान गरे । ५औँ ओभरमै मुम्बई कप्तानसमेत रहेका ओपनर रोहित शर्मा १२ बलमा जम्मा ५ रन बनाए  आउट भएका थिए । 

डीकक र सूर्यकुमार यावदले राम्रो साझेदारी गरे । १० औँ ओभरमा डिकक आउट भएपछि आएका इशान किशनले पनि आक्रामक प्रदर्शन गर्दै मुम्बईलाई जित नजिक पुर्‍याए । पछिल्लो ५ ओभरमा दिल्लीले ३ विकेट लिई मुम्बईका ब्याट्सम्यानलाई खासै चल्न नदिएपछि त्यो निकै ढिला भइसकेको थियो । दिल्लीका लागि कागिसो रबाडाले २ विकेट लिँदा रविचन्द्रन मार्कुस स्टोनिस र अक्सर पटेलले १–१ विकेट लिए । 

पहिले ब्याटिङ गरेको दिल्लीका लागि शिखर धावनले ६९ रनको योगदान गरे । कप्तान श्रेयर ऐय्यरले ४२ रन बनाए । अन्यले गतिलो योगदान गर्न सकेनन् । 
मुम्बईका लागि क्रनल पाण्डेयले २ र ट्रेन्ट बोल्टले १ विकेट लिए । 

हिजोको खेलमा दिल्लीले टोलीमा केही परिवर्तन गरेको थियो । विकेटकिपर श्रषभ पन्तको ठाउँमा विकेटकिपरका रुपमा अस्ट्रेलियाका विकेटकिपर ब्याट्सम्यान एलेक्स केरीलाई समावेश गरेको थियो । मध्य क्रमका ब्याट्सम्यान सिम्रोन हटमायरलाई हटाएर अजिन्का रहानेलाई टोलीमा समेटेको थियो । 

जितसँग मुम्बई १० अंकमा साथ शीर्ष स्थानमा उक्लिएको छ । समान अंक भएका दिल्ली रनरेटमा पछि परेका कारण दोस्रो स्थानमा छ ।