नेत्रविक्रम चन्द (विप्लव) नेतृत्वको नेपाल कम्युनिस्ट पार्टीले जनताको स्वास्थ्यमा खेलवाड नगर्न चेतावनी दिँदै सरकारविरुद्ध संघर्षका कार्यक्रम सार्वजनिक गरेको छ ।
कोरोना परीक्षण र उपचारको शुल्क लिने निर्णय गरेको भन्दै सरकारको चौतर्फी आलोचना भइराखेको बेला विप्लवले जनताको स्वास्थ्यमा खेलवाड नगर्न चेतावनी दिँदै संघर्षका कार्यक्रम सार्वजनिक गरेका हुन् ।
केही व्यक्तिको आम्दानीका लागि सरकारले जनताको स्वास्थ्यमा खेलवाड गरेको आरोप विप्लवको छ ।
वर्तमान सरकार जनता र राष्ट्रपति गैरजिम्मेवार बनेको आरोप विप्लवको छ । उनले सरकारका क्रियाकलापले राष्ट्रियता, जनतन्त्र र जनजीविकाका विषय अझै जटिल बन्दै गएको बताएका छन् ।
कोरोनाको निःशुल्क परीक्षण नगरेर सरकारले मानवीय व्यवहारसमेत प्रदर्शन नगरेको ठहर उनको छ ।
‘राज्यको सम्पूर्ण शक्ति कोरोनाको नियन्त्रण र कोरोनाको प्रभावले आक्रान्त जनतालाई राहत पुर्याउन लाग्नुको सट्टा स्वास्थ्य परीक्षणजस्तो संवेदनशील र राज्यको न्यूनतम् दायित्वबाट समेत पन्छिने कार्य अत्यन्तै निकृष्ट र अमानवीय विषय हो’, विप्लवको विज्ञप्तिमा भनिएको छ, ‘यसले सरकारको जनताप्रतिको चरम लापरबाही र असंवेदनशीलतालाई नै पुष्टि गरेको छ ।’
सत्ताको आडमा भ्रष्टाचार बढेको भन्दै विप्लवले कात्तिक १५ गतेदेखि २० गतेसम्म सरकारविरुद्ध संघर्षका कार्यक्रम सार्वजनिक गरेको हो ।
विप्लवले सरकारविरुद्ध घोषणा गरेका आन्दोलनका कार्यक्रममा कात्तिक १५ गते कोणसभा गर्ने, १७ गते पर्चा वितरण गर्ने र २० गते विरोध जुलुस निकाल्ने रहेका छन्।
फरकधारमा प्रकाशित कुनै समाचारमा तपाईंको गुनासो भए हामीलाई [email protected] मा इमेल गर्न सक्नुहुनेछ । यही इमेलमा तपाईंले आफ्नो विचार वा विश्लेषण, सल्लाह र सुझाव पनि पठाउन सक्नुहुनेछ । हामीसँग तपाईं फेसबुक, ट्विटर, इन्स्टाग्राम, युट्युबमा पनि जोडिन सक्नुहुन्छ ।