बजारमा कुभिण्डोको माग कम भएपछि मूल्य पनि सस्तिएको छ ।

कोभिड संक्रमणको जोखिमका कारण मठमन्दिरहरु सर्वसाधारणका लागि बन्द छन् । नवरात्रिमा मन्दिर गई कुभिण्डोको विधिपूर्वक पूजाआजा गरी देवीदेवतालाई चढाउने चलन छ । तर, श्रद्धालुहरुका लागि मठमन्दिरमा पूजाआजा गर्न रोक लगाइएपछि यस वर्षको दसैंमा कुभिण्डोको माग घटेको छ । 

खासगरी नवरात्रिको चौथो दिन कुष्माण्डा देवीको पूजा गर्न र नवमीको दिन पशु बलि नदिनेहरुले कुभिण्डो बलि दिनका लागि प्रयोग गर्ने चलन रहेको छ । तर, यस वर्ष कोभिड संक्रमणका कारण मठमन्दिर लगायत शक्तिपीठहरुमा पूजाआजा गर्न रोक लगाइएपछि कुभिण्डोको माग घटेको हो । माग घटेपछि मूल्य पनि घटेको छ । गत वर्ष एउटा कुभिण्डो झण्डै ४ सय रुपैयाँमा बिक्री भएको तर यस वर्ष सयदेखि १५० रुपैयाँमा पनि बिक्री हुन नसकेको व्यापारीहरुले बताएका छन् । 

काठमाडौंको आरएनएसी क्षेत्रमा पुग्दा व्यापारीहरुले सडकमा कुभिण्डो बिक्रीका लागि राखेको देखिन्छ भने कुभिण्डो किन्नेहरु देखिँदैनन् । अघिल्लो वर्ष दुई तीन सयको संख्यामा कुभिण्डो बिक्री भएको तर अहिले १०/१५ वटा पनि बिक्री नभएको गुनासो व्यवसायीहरुको छ ।