भारतमा बुधबारसम्म कोरोना भाइरसबाट संक्रमितको संख्या एक करोड एक लाखनजिक पुगेको छ । 

विगत २४ घण्टाको अवधिमा २३ हजार ९५० नयाँ संक्रमित फेला परेसँगै भारतमा कोरोना संक्रमितको संख्या एक करोड ९९ हजार ९५० पुगेको केन्द्रीय स्वास्थ्य तथा परिवार कल्याण मन्त्रालयले जनाएको छ । 

गत २४ घण्टामा भारतमा कोरोना संक्रमणको कारण ३३३ जनाको मृत्यु भएपछि कोरोना भाइरसबाट मृत्यु हुनेको संख्या एक लाख ४६ हजार ४४४ जना पुगेको छ । 
भारतको राजधानी दिल्लीमा गत २४ घण्टामा ९३९ जनामा कोरोना भाइरस संक्रमण देखिएको र २५ जनाको संक्रमणको कारण मृत्यु भएको छ ।

मन्त्रालयको पछिल्लो विवरण अनुसार ९६ लाख ३८२ हजार व्यक्ति संक्रमणमुक्त भएका छ । हाल भारतमा दुई लाख ८९ हजार २४० सक्रिय संक्रमित छन् । 

यसैबीच, सरकारले देशका विभिन्न भागमा कोभिड–१९ परीक्षणलाई तीव्रता दिने बताएको छ । देशभर  हालसम्म १६ करोड ४२ लाख ६८ हजारको नमुना परीक्षण गरेको भारतीय स्वास्थ्य अनुसन्धान परिषद्ले जानकारी दिएको छ ।