पृथ्वीनारायण शाहको २९९औँ जन्मजयन्ती तथा राष्ट्रिय एकता दिवस सुर्खेतमा पनि मनाइएको छ । पृथ्वीनारायण शाहको फोटोसहितको ब्यानरमा राष्ट्रिय प्रजातन्त्र पार्टी सुर्खेतले बजार क्षेत्रमा बृहत र्याली निकालेको थियो । 

राजतन्त्रको पक्षमा नारा लगाउँदै राष्ट्रिय प्रजातन्त्र पार्टीका नेता, कार्यकर्ता तथा अन्य राजवादीहरु र्यालीमा सहभागी भएका हुन् । 

वीरेन्द्रनगरस्थित मंगलगढी चोकबाट सुरु गरिएको र्याली बिचबजार हुँदै वीरेन्द्रचोकमा पुगेर कोणसभामा परिणत भएको थियो । 

कोणसभामा सहभागी नेताहरुले वर्तमान सरकारको चर्को विरोध गरेका थिए । देशमा राजतन्त्र आवश्यकता भएको भन्दै उनीहरुले राजतन्त्रको पक्षमा उभिन जनतालाई अपिल समेत गरे ।