बर्दिया घर भई कर्णाली प्रदेशको हुम्लामा कार्यरत एक प्रहरीको लडेर मृत्यु भएको छ ।  हुम्लाको चङ्खेली गाउँपालिकास्थित मेल्छाम प्रहरी चौकीमा कार्यरत हवल्दार देवेन्द्र खड्काको मृत्यु भएको हुम्ला प्रहरीले जनाएको छ । 

खड्का पुस २८ गते सुरक्षा गस्तीमा गएका थिए । सो समय माथिबाट आएको ढुंगा छल्न खोज्दा भीरबाट लडेर घाइते भएका थिए । 

गम्भीर घाइते उनलाई सुरुमा उपचारका लागि गाउँपालिकामै रहेको पिप्लाङस्थित स्वास्थ्य संस्थामा लगिएको थिया । त्यहाँबाट नेपालगन्ज लगिएका खड्कालाई त्यहाँ उपचार हुन नसकेपछि  नेपाल प्रहरी अस्पताल महाराजगन्ज लगिएको प्रहरीले जनाएको छ ।  प्रहरी अस्पताल महाराजगन्जमै उनको शुक्रबार मृत्यु भएको जिल्ला प्रहरी कार्यालय हुम्लाले जनाएको छ ।