सुदूरपश्चिम प्रदेशको डोटीमा प्रहरीले एक किलोभन्दा बढी सुन र साढे १७ लाख नगद बरामद गरेको छ । जिल्लाको केआईसिंह गाउँपालिका वडा नम्बर ६ भिताणीमा लुकाएर राखेको सुन र १७ लाख ४७ हजार नगर बरामद गरिएको हो ।

जिल्ला प्रहरी कार्यालय डोटीका प्रहरी निरीक्षक कान्तिराज जोशीले नगद बोकेर तराई जाने क्रममा वृद्ध महिला काली भुललाई पक्राउ गरिएको बताए ।

उनका अनुसार सोधपुछका क्रममा घरमा ठूलो परिणाममा सुन रहेको खुलेपछि घरबाट ११ सय ग्राम सुन बरामद गरिएको हो । भुललाई पनि पक्राउ गरिएको जोशीले बताए ।

प्रहरीका अनुसार भारतमा मजदुरी गर्दै आएका एक व्यक्तिले भदौमा ठूलो परिणाममा सुन पठाएका थिए । तर, सुन पठाउने व्यक्ति गाउँमा छैनन् । सुन अन्य व्यक्तिले पनि बाँडेर लिएको हुनसक्ने आशंका गरिएको छ ।