विभाजनपूर्वको नेकपाका उपाध्यक्ष वामदेव गौतमले बुधबार (आज)बाट पार्टी एकता राष्ट्रिय अभियानको घोषणा गरेका छन् । ललितपुरको धोबिघाटस्थित सिद्धार्थ कटेजमा औपचारिक कार्यक्रमको आयोजना गरी अभियानको घोषणा गरिएको हो । 

अभियानको घोषणा कार्यक्रममा नेता गौतमको पक्षमा विभाजनपूर्वका नेकपाका एकजना केन्द्रीय कमिटीका सदस्यबाहेक अन्य शीर्ष नेता मञ्चमा देखिएनन् । तर, कार्यक्रममा केही जनप्रतिनिधि, विश्वविद्यालयका पूर्वउपकुलपतिलगायत व्यक्ति सहभागी भए । 

नेता गौतमको पार्टी एकता अभियानलाई नेकपा केन्द्रीय सदस्य हरि कार्की, बागमती प्रदेशसभा सदस्य विनोद खड्का, पूर्वसांसद माया ज्ञवालीलगायतले साथ दिएका छन् । त्यस्तै, त्रिभुवन विश्वविद्यालयका पूर्वउपकुलपति हिराबहादुर महर्जन, कीर्तिपुर नगरपालिकाका प्रमुख रमेश महर्जन, उपप्रमुख सरस्वती खड्कासहित विभिन्न जिल्लाका जनप्रतिनिधि गौतमको अभियानमा सहभागी भएका छन् । अभियानको संयोजकमा वाामदेव गौतम स्वयं रहेका छन् भने सह–संयोजकमा केन्द्रीय सदस्य हरि पराजुली र  सचिवमा बाबुराम थापा रहेका छन् ।

विवादित कार्की पनि गौतमको अभियानमा

यसैबीच केही समयअघि नेता वामदेव गौतमको नाम लिएर प्रहरीमा जागिर लगाइदिन्छु भन्दै घुस लिएका कारण पक्राउ परेका डिबी कार्की पनि यो अभियानमा जोडिएका छन् । पूर्वसंविधानसभा सदस्य समेत रहेका कार्की केही समय जेलसमेत बसेर छुटेका थिए । 

एकता अभियान केन्द्रदेखि प्रत्येक स्थानीय तह र वडासम्म लैजाने गरी एकता समन्वय समिति गठन गरिएको छ । त्यस अवसरमा बोल्दै नेता गौतमले एकता अभियान लामो समयसम्म चल्ने बताए । तर, अहिलेका लागि ६ महिनाको समयावधि राखेर गतिविधि सञ्चालन गरिने उनले बताए । 

त्यस अवसरमा बोल्दै नेता गौतमले दुईतिहाइ बहुमत भएको छँदाखाँदाको पार्टी फुटाउनुमा प्रधानमन्त्री केपी शर्मा ओली र पुष्पकमल दाहाल प्रचण्ड दुवै पक्षको बराबरी हात रहेको औँल्याए । प्रधानमन्त्री ओलीका केही व्यक्तिवादी, निरंकुश, एकात्मक शैलीसँग आफू पनि सहमत नभएको भन्दै उनले तर पार्टी फुटाएर जाने कार्य उत्तम विकल्प नभएको बताए । 

पार्टीभित्रै बसेर त्यस्ता प्रवृत्तिसँग लड्नुपर्ने उनको धारणा थियो । ‘उहाँहरुले फुटे फुट्छ भनेर अविश्वासको प्रस्ताव अगाडि सार्नुभयो । (प्रधानमन्त्रीले) प्रतिनिधिसभाको कार्यकाल २ वर्ष बाँकी रहँदै प्रतिनिधिसभा भंग गर्नुभयो,’ नेता गौतमले भने, ‘पार्टीमा अल्पमतमा परेको अवस्थामा राष्ट्रपतिकहाँ राजीनामा लगेर गएको भए केपी ओली कति महान् नेता बन्नुहुन्थ्यो । पार्टी एकताका निम्ति ओलीले किन त्याग गर्न नसकेको ?’

त्यस्तै, एकता अभियान घोषणासभालाई सम्बोधन गर्दै पराजुलीले दुवै पक्ष गएमा आउने चुनावमा दुवैलाई बहिष्कार गर्न मतदातालाई आह्वान गर्ने चेतावनी दिए । पार्टी दुई टुक्रा भएको अवस्थामा कुनै पनि समूहले चुनाव जित्ने अवस्था नरहेको उनको भनाइ थियो । 

अभियानको केन्द्रीय समन्वय समितिको बैठक ६ महिनामा र प्रदेश समन्वय समितिको बैठक ३ महिनामा बस्ने भनिएको छ । यसले गर्दा पनि तत्काल गौतम समूह दुवै पक्षमा नखुल्ने देखिएको छ । अभियान घोषणा कार्यक्रममा सभाहलमा सहभागी खचाखच थिए । तर, मञ्चमा भने नेताहरु थिएनन् । 

नेता गौतम, कार्कीलगायत वामदेवपत्नी तथा पूर्व सांसद तुलसा थापा, जीवराज आश्रितपत्नी पूर्वसांसद माया ज्ञवालीबाहेक अन्य नेता कार्यक्रममा सहभागी भएनन् । तर, सभाहलमा कार्यकर्ताको उपस्थिति भने बाक्लो देखिन्थ्यो । रोस्टर्मबाट वामदेवले केही समयमै ओली समूहका ओलीबाहेक बाँकी सबै नेता र प्रचण्ड समूहका केही नेताबाहेक सबै नेता आफ्नो अभियानमा आउने दाबी गरिरहँदा उपस्थित सहभागीले तालीको वर्षा गरिरहेका थिए । त्यसो त गौतमले दाबी गरेको जस्तो अभियानले सार्थकता पाउन सकेन भने स्वयं गौतमकै अवस्था के रहन्छ भन्न सकिँदैन । 

अभियान घोषणा गर्दै गर्दा गौतमले भनेका छन्, ‘म बाँच्दासम्म पार्टी एकता गराउने र सानो भए पनि समाजवादको विरुवा रोप्न सकियो भने, शान्तिको सास फेर्न सकिनेछ ।’ उनले सर्वोच्च अदालतमा सुनुवाइको क्रममा रहेको प्रतिनिधिसभा पुनर्गठनसम्बन्धी मुद्दाको फैसला हुनेबित्तिकै ओली र प्रचण्डको समूहमा भएका धेरै नेता आफ्नो अभियानमा आउने दाबी गरे । 

‘उहाँहरुले सर्वोच्चको फैसला कुरिदिनका निम्ति आग्रह पनि गर्नुभएको छ । प्रचण्डको नेतृत्वमा भएका केहीबाहेक ठूलो पंक्ति र ओलीको नेतृत्वमा भएका उहाँबाहेक सबै शक्ति एकताको पक्षमा छ,’ गौतमले भने, ‘हामीलाई विश्वास छ, आज १ जना केन्द्रीय सदस्य हाम्रो पक्षमा छन् । तर, विस्तारै ठूलो पंक्ति हाम्रो अभियानमा आउनेछन् ।’