नेकपा दाहाल-नेपाल समूहका अध्यक्ष पुष्पकमल दाहाल प्रचण्डले प्रतिनिधिसभा विघटन गर्ने सरकारको कदमले आफूलाई जनतासँग जोडिदिएको बताएका छन्। बहिर्गमित जनमुक्ति सेना नेपालको राष्ट्रिय सम्मेलनलाई बुधबार सम्बोधनका क्रममा प्रचण्डले यसो भनेका हुन्। 

प्रतिनिधिसभा विघटन गर्ने प्रधानमन्त्री केपी शर्मा ओलीको पुस ५ गतेको कदमपछि छुट्टै समूह बनाएर आन्दोलनरत प्रचण्डले आफूलाई फेरि क्रान्ति र आन्दोलनमा जोडिदिएको बताए।

'अहिले सडकमा पलेँटी कसेर बस्न पाउँदा खुसी छु। यसले मलाई फेरि एक पटक जनतासँग, तपाईंहरुसँग जोडिदिएको छ', दाहालले सम्बोधनका क्रममा भने, 'फेरि मलाई क्रान्तिसँग, आन्दोलनसँग जोडिदिएको छ। यसलाई पनि जनतासँग जोड्न अवसरको रुपमा लिएको छु।'

आफूले हिजो जनयुद्धका क्रममा लड्दै गर्दा मर्न पनि तयार भएको उनले बताए। 'आज पनि आन्दोलनसँग जोडिएर अघि बढ्न पाउँदा खुसी छु', उनले भने, 'जनयुद्धमा पनि 
मर्न पाउँदा खुसीको कुरा हुन्थ्यो। प्रतिगमनविरुद्धको आन्दोलनले मलाई जनतासँग जोडेको छ। अबको १० वर्ष सक्रिय हुन्छु भन्ने लागेको छ। त्यो बेलासम्म देशलाई समाजवादतर्फ लैजानेछु।'