प्रदेश १ का मुख्यमन्त्री शेरधन राईले राजनितिक स्थायित्व र समृद्धिका लागि निर्वाचन आवश्यक रहेको बताएका छन्। केपी ओलीनिकट प्रेस संगठन नेपालको प्रदेश १ भेलालाई शुक्रबार विराटनगरमा सम्बोधन गर्दै राईले यस्तो बताएका हुन्। 

उनले जनताको अभिमत अनुसार सरकारले लोकप्रिय काम गरिरहेका बेला पुष्पकमल दाहाल प्रचण्ड र माधवकुमार नेपालसहितले भाँजो हाल्ने काम गरेको तर्क गरे। 

'जनताले दिएको अभिमत अनुसार सबै सरकारले लोकप्रिय काम गरिरहेका थिए। समृद्ध नेपाल र सुख नेपाली अभियानलाई असफल बनाउने प्रयास भइरहेको छ', उनले भने, 'तर कुर्सीका लागि प्रधानमन्त्रीलाई घेराबन्दी गर्ने काम भयो। अपराधी करार गरेर आरोप लगाइयो, राजनीतिमा अस्थिरता ल्याउन खोजियो।' 

यही कारण ताजा जनादेशको लागि निर्वाचन आवश्यक रहेको दाबी पनि उनले गरे। 'अब सडकमा आन्दोलन गर्दैमा लोकतन्त्र बलियो हुँदैन। लोकतन्त्रका लागि जनताको जनादेश नै उत्तम विकल्प हो', उनले भने, 'यसबीचमा मुख्यमन्त्री हटाउने प्रयास भए। प्रदेशमा अस्थिरता ल्याउने काम भएको छ। यो प्रयास असफल हुनेछ।'