नेपाली कथानक चलचित्र ‘माइतीघर २’ बन्ने भएको छ । दि सुपर काजोल फिल्मसको ब्यानरमा बन्न लागेको यो चलचित्रमा अभिनेता भुवन केसी र उनका छोरा अनमोल केसी सँगै देखिने भएका छन् । 

यो चलचित्र पुरानो ‘माइती घर’को कथा जहाँबाट सकिएको थियो त्यहीँबाट सुरु हुने भुवन केसीले बताए । चलचित्र भुवनले नै निर्माण गर्न लागेका हुन् । दि सुपर काजोल फिल्मसको इन्स्टाग्राम पेजबाट चलचित्र निर्माणको औपचारिक घोषणा गरिएको हो । 

दर्शकले आफू र अनमोललाई एउटै पर्दामा हेर्ने चाहना राखेकाले छोरासँग स्क्रिन सेयर गर्न लागेको भुवनले बताएका छन् । चलचित्रमा अभिनय गर्ने अन्य कलाकारका बारेमा केही बताइएको छैन । 

छोरासँगै स्क्रिन सेयर गर्न लागेका भुवन पर्दामा भने अनमोलको बुवा भएर नदेखिने बताउँछन् । उनले ‘माइतीघर २’मा विशेष भूमिकामा देखिन लागेको पनि जानकारी दिएका छन् । आफ्ना दर्शकका लागि आफ्नो भूमिका सरप्राइज हुने बताए । 

यो चलचित्र निर्माणको घोषणा अघि नै भुवनले अर्को चलचित्र ‘एन्टी हिरो’मा काम गर्ने खबर सार्वजनिक भएको थियो । ‘एन्टी हिरो’मा भुवनलाई खलपात्रका रुपमा प्रस्तुत गर्ने निर्देशकको तयारी थियो । अहिले आएर भुवनले ‘एन्टी हिरो’लाई पोस्टपोन्ड गर्दै ‘माइतीघर २’को निर्माण थाल्ने भएका हुन् ।