देशमा कोरोनाभाइरसको प्रकोप निरन्तर बढिरहेको छ । आइतबार दिनभर चाहिँ कोरोनाको कहरको होइन, सन्चारमाध्यममा लुम्बिनी प्रदेशमा भएको राजनीतिक खिचातानीका समाचार बढी आए । 

आइतबार विहानै जब लुम्बिनीका मुख्यमन्त्री शंकर पोखरेलले राजीनामा दिए, त्यसपछि देशभर कोरोनाका कारण सेलाएको माहोल, लुम्बिनीमा ह्वात्तै बढ्यो ।

पोखरेलले आफू फेरि मुख्यमन्त्रीमा नियुक्त हुने निश्चित भएपछि राजीनामा दिएको अड्कलबाजी गर्न थालियो । हुन पनि आइतबार दिउँसो नै उनी बहुमत प्रमाणित गर्दै मुख्यमन्त्रीमा नियुक्त भएका छन् । तर, पोखरेल मुख्यमन्त्रीमा नियुक्त भएपछि त्यहाँको माहोल सेलाएको छैन, झन् गर्माएको छ ।

मुख्यमन्त्रीका लागि बहुमत प्रदेश सभा सदस्यहरुको नामावली जसै पोखरेलले प्रदेश प्रमुखलाई बुझाएका थिए, लुम्बिनीमा हलचल आयो, विमला वली माओवादी केन्द्रमा लागेको चर्चाले । केही समयमा उनले आफू माओवादी केन्द्रमा लाग्नुको कारण खुलाउँदै पत्रकार सम्मेलन पनि गरिन् ।

वली माओवादी केन्द्रमा लागेपछि नै पोखरेलले दाबी गरेको बहुमत गुमेको तर्क गर्न थालिएको छ ।

अर्कोतिर पोखरेल मुख्यमन्त्रीमा नियुक्त भएपछि सूर्य चिन्हमा नै निर्वाचनमा सहभागी भएका र जितेका केही सांसदहरुले राजीनामा दिएका छन्, केहीले पोखरेललाई दिएको समर्थन फिर्ता लिएको बताएका छन् ।

तेस्रो पक्ष, माओवादी केन्द्रले नेतृत्व गरेको एक समूहले आफूहरुसँग बहुमत पुग्ने सांसद सदस्य संख्या रहेको भन्दै प्रदेश प्रमुखकहाँ आफूलाई समर्थन गरेका सांसदको सूची पुर्याएको छ । 

यी तीन कारणले नैतिक रुपमा फेरि मुख्यमन्त्रीमा नियुक्त भएका पोखरेललाई समस्या पर्ने देखिएको छ ।